दलित, गरिब र सीमान्तकृतका विद्यार्थीलाई छात्रवृत्ति

महेश सिंह लहान –लहान नगरपालिका–३ स्थित लक्ष्मण ललिता कुशवाहा माध्यमिक विद्यालयमा अध्ययनरत दलित, गरिब र सीमान्तकृत समुदायका दर्जनौं विद्यार्थीलाई छात्रवृत्ति वितरण गरिएको छ।
विद्यालय परिसरमा आयोजित कार्यक्रममा वडा नम्बर ३ का वडाध्यक्ष राम दयाल महतोको उपस्थितिमा छात्रवृत्ति वितरण गरिएको हो। कार्यक्रममा विद्यालयका लेखा प्रमुख श्यामसुन्दर महतो, व्यवस्थापन समितिका सदस्य मोहम्मद सलाम अन्सारी, प्रमोद महतो, शिक्षक चुरामणि महतो, ओम प्रकाश महतो लगायत सरोकारवाला सहभागी थिए।
छात्रवृत्तिबाट विद्यार्थीहरूको पठनपाठनमा सहयोग पुग्ने विद्यालयले जनाएको छ। “आर्थिक रूपमा पछाडि परेका विद्यार्थीलाई शिक्षामा निरन्तरता दिन छात्रवृत्तिले टेवा पुर्‍याउने विश्वास लिएका छौं,” लेखा प्रमुख महतोले भने। विद्यालयले प्रत्येक वर्ष आवश्यकता अनुसार छात्रवृत्ति वितरण गर्दै आएको छ।