लहानमा सूचना प्रविधि दिवसको अवसरमा प्रभातफेरी

महेश सिंह लहान – “सूचना प्रविधिको अभियान, डिजिटल नेपालको निर्माण” नारासहित लहानमा शुक्रबार प्रभातफेरी सम्पन्न भएको छ। राष्ट्रिय सूचना तथा संचार प्रविधि दिवस २०२५ को अवसरमा आयोजना गरिएको प्रभातफेरीमा करिब ३०० जना सहभागी भएका थिए।
कम्प्युटर एसोसिएसन नेपाल महासंघ जिल्ला शाखा सिरहाको आयोजनामा प्रभातफेरी बिहान ६:३० बजे पशुपति आदर्श माध्यमिक विद्यालयको प्रांगणबाट सुरु भई नगरका विभिन्न भाग परिक्रमा गरी सम्पन्न भएको थियो।
कार्यक्रममा लहान नगरपालिकाका प्रमुख प्रमुख अतिथि थिए। कार्यक्रममा क्यान महासंघ जिल्ला शाखा सिरहाका अध्यक्ष नन्दकिशोर गुप्ता, कम्प्युटर एसोसिएसन मधेश प्रदेश सचिव संजय कुमार ठाकुर, ल्यन्स क्लबका शंकर प्रसाद गुप्ता, पत्रकार जीवछ उदासी लगायतको उपस्थिति थियो।
नगरप्रमुखले सूचना प्रविधिले आर्थिक र सामाजिक रुपान्तरणमा महत्त्वपूर्ण भूमिका खेलेको बताए। उनले नगरपालिकामा डिजिटल सेवा विस्तारका लागि पहल गर्ने प्रतिवद्धता व्यक्त गरे।
क्यान अध्यक्ष गुप्ताले कृत्रिम बौद्धिकता (एआई) को युगसँगै सूचना प्रविधिले नयाँ सम्भावना सिर्जना गरेको बताए। उनले प्रविधिको प्रयोग शिक्षादेखि सेवा प्रवाहसम्म प्रभावकारी बनेको उल्लेख गरे।
ल्यन्स क्लबका गुप्ता, पत्रकार उदासी लगायतले स्थानीय तहदेखि संघीय तहसम्म प्रविधि अभिमुखीकरण आवश्यक रहेको धारणा राखे।
कार्यक्रममा विद्यार्थी, शिक्षक, पत्रकार, सामाजिक संघसंस्था, सूचना प्रविधिमा सक्रिय व्यक्तिहरूको सहभागिता थियो। सहभागीहरूले प्रभातफेरी गर्दै डिजिटल नेपाल निर्माणको सन्देश प्रवाह गरेका थिए।  क्यान अध्यक्ष गुप्ताले उक्त प्रभातफेरीले प्रविधि सचेतना अभिवृद्धिमा मद्दत पुगेको बताए।