महेश सिंह सिरहा – सिरहामा पछिल्लो समय देखिएको प्रशासनिक फेरबदलले विभिन्न अड्कलबाजी जन्माएको छ। भ्रष्टाचारी र तस्करीका रक्षक बनेका प्रशासनिक दुई नेतृत्व माथी तानिएका छन्। प्रहरी उपरीक्षक (एसपी) रमेश पण्डितलाई प्रहरी प्रधान कार्यालयले हेडक्वार्टर तानेको छ, भने उनको स्थानमा एसपी अनन्तराज शर्मा आउने भएका छन्। केही दिनअघि मात्र सिरहाका प्रमुख जिल्ला अधिकारी (सीडीओ) बासुदेव दाहाल गृह मन्त्रालय तानिएका थिए।
सिरहामा प्रशासनिक नेतृत्व परिवर्तन हुनु सामान्य प्रक्रियाको हिस्सा हो वा पछिल्लो समय भएको औरही महायज्ञ प्रकरणको प्रभाव, यो बहसको विषय बनेको छ। महायज्ञलाई लिएर स्थानीय प्रशासनको भूमिकामाथि प्रश्न उठेपछि सीडीओ दाहालको सरुवा भएको थियो। यसै सन्दर्भमा एसपी पण्डितको हेडक्वार्टर तानिनुलाई पनि कतिपयले सोही घटनासँग जोडेर हेरिरहेका छन्।
स्थानीय स्रोतका अनुसार सिरहाको प्रशासनिक नेतृत्वमाथि सिमानाकामा तस्करी, सामाजिक विकृति र भ्रष्टाचार नियन्त्रणमा कमजोरी देखाएको आरोप लाग्दै आएको थियो। केही समूहले पण्डित र दाहाललाई आर्थिक लाभका लागि प्रशासनिक शक्ति दुरुपयोग गरेको आरोप लगाएका छन्।
सिरहामा अबको प्रहरी नेतृत्वले सुशासन, कानुनी व्यवस्था र समाजिक सुधारमा ध्यान दिने आशा गरिएको छ। एसपी अनन्तराज शर्मा आउँदा, प्रशासनिक शुद्धीकरणको पहल कस्तो रहन्छ भन्ने हेर्न बाँकी छ। यो नेतृत्व परिवर्तन प्रशासनिक सुधारको हिस्सा हो वा पछिल्लो घटनाक्रमको प्रत्यक्ष प्रभाव? यो प्रश्नको जवाफ समयले नै दिनेछ।
Discussion about this post