महेश सिंह लहान- नेपाल रेडक्रस सोसाइटी लहान उपशाखाको २२औं वार्षिक साधारणसभा शनिबार लहानमा सम्पन्न भएको छ। सभामा आर्थिक वर्ष २०८१/८२ को वार्षिक प्रगति प्रतिवेदन प्रस्तुत गर्दै उपशाखाले जिल्लामा निरन्तर २४सै घण्टा रक्तसञ्चार सेवा प्रदान गर्दै आएको जानकारी दिएको छ।
उपशाखाका सचिव महेश कुमार महतोले प्रस्तुत गरेको प्रतिवेदनअनुसार वर्षभरि जिल्लाका विभिन्न ४८ स्थानमा रक्तदान कार्यक्रम आयोजना गरिएको थियो। मोबाइल टोली तथा स्वयंसेवी रक्तदाताबाट संकलित हजारौं युनिट रगत लहानसहित सिरहा, कर्जन्हा, मिर्चैया, गोलबजारलगायतका अस्पतालमा वितरण गरिएको रक्तसञ्चार सेवा केन्द्रका इन्चार्ज प्रदीप कुमार यादव ‘मनिष’ले बताए।
रेडक्रसले अतिविपन्न परिवारलाई कम्बल वितरण गर्नुका साथै नवराजपुर गाउँपालिकाका ६० जना बिरामी र थ्यालेसेमिया पीडित १५४ बालबालिकालाई निःशुल्क रक्त सेवा दिएको जनाएको छ। स्थानीय सरकारको सहयोगमा सेवा केन्द्रको भवन मर्मत, भान्सा तथा शौचालय निर्माणसमेत सम्पन्न भएको छ।
सभामा आगामी आर्थिक वर्ष २०८२/८३ का लागि रगत व्यवस्थापन सफ्टवेयर सञ्चालन, विपद् व्यवस्थापन कार्यक्रम विस्तार, अत्याधुनिक ल्याब स्थापना र रक्त संकलनका लागि भ्यान खरिदलगायतका योजना अघि सारिएका छन्।
सभालाई सम्बोधन गर्दै लहान नगरपालिकाका नगर प्रमुख महेश प्रसाद चौधरीले ‘रक्तदानभन्दा ठूलो दान केही हुँदैन’ भन्दै रक्त संकलनका लागि आवश्यक चार चक्का गाडी खरिदमा नगरपालिकाबाट ५ लाख रुपैयाँ सहयोग गर्ने घोषणा गरे। उपशाखाका सभापति फुलेश्वर महतोको अध्यक्षतामा सम्पन्न कार्यक्रममा पूर्वमन्त्री राजलाल यादव, नेपाल रेडक्रस सोसाइटी सिरहा शाखाका उपाध्यक्ष बेच्न प्रसाद यादव, प्रादेशिक अस्पताल लहानका अध्यक्ष राम नारायण मेहता, नेत्र ज्योति संघका चन्देश्वर महतो, समाजसेवी जयकृष्ण यादव तथा नेपाल पत्रकार महासंघ सिरहाका अध्यक्ष मनोज बनैता, जिल्ला ट्राफिक प्रहरी कार्यालय सिरहा लहानका इन्चार्ज सहभागी थिए।
कार्यक्रमको अन्त्यमा रेडक्रसको मानवीय सेवालाई अझ प्रभावकारी बनाउन स्थानीय तह, संघसंस्था र स्वयंसेवकबीच सहकार्य आवश्यक रहेको निष्कर्ष निकालिएको थियो।
Discussion about this post