महेश सिंह लहान,सिरहा – नेपाल कम्युनिष्ट पार्टी (एमाले) को केन्द्रीय सदस्य पदमा निर्वाचित भई गृह नगर लहान फर्कनुभएका लहान नगरपालिकाका पूर्व मेयर मुनि साहलाई पार्टी कार्यकर्ताहरूले भव्य स्वागत तथा सम्मान गरेका छन्।
लहान प्रवेशका क्रममा एमाले नेता तथा कार्यकर्ताहरूले बाजागाजा, फूलमाला र नाराजुलुससहित साहको स्वागत गरेका थिए। स्वागत कार्यक्रममा बोल्दै नेता तथा कार्यकर्ताहरूले मुनि साहको केन्द्रीय सदस्य पदमा निर्वाचित हुनुलाई लहान र समग्र मधेस प्रदेशका लागि गर्वको विषय भएको बताएका थिए।
कार्यक्रममा बोल्दै केन्द्रीय सदस्य मुनि साहले पार्टीले दिएको जिम्मेवारीलाई इमानदारीपूर्वक निर्वाह गर्ने प्रतिबद्धता व्यक्त गर्दै संगठन सुदृढीकरण, जनताको सेवा र पार्टीको नीति–कार्यक्रमलाई प्रभावकारी रूपमा कार्यान्वयन गर्न आफू प्रतिबद्ध रहेको बताउनुभयो।
स्वागत कार्यक्रममा नेकपा एमालेका स्थानीय नेता, जनप्रतिनिधि,युवा तथा महिला संगठनका प्रतिनिधि, शुभेच्छुक र सर्वसाधारणको उल्लेखनीय उपस्थिति रहेको थियो।कार्यकर्ताहरूले साहको नेतृत्वमा लहानको विकास र पार्टी संगठन थप मजबुत हुने विश्वास व्यक्त गरेका छन्।
Discussion about this post