रोयल सफ्टेक कलेजमा कक्षा ११ का नवआगन्तुक विद्यार्थीलाई भव्य स्वागत

महेश सिंह सिरहा लहान- रोयल सफ्टेक कलेजमा कक्षा १२ विज्ञान, वाणिज्य तथा शिक्षा संकायमा अध्ययनरत छात्र–छात्राहरूले नवआगन्तुक कक्षा ११ का भाइबहिनीहरूको सम्मानमा स्वागत समारोह सम्पन्न गरेका छन्।
कलेज परिसरमा आयोजित उक्त कार्यक्रम कलेजकी संस्थापिका अध्यक्ष रेणु देवी साह तथा संस्थापक प्रमुख डा. महादेव साहको प्रमुख आतिथ्यतामा भव्य र सभ्य वातावरणमा सम्पन्न भएको हो। कार्यक्रममा कलेजका प्रशिक्षकहरू, प्रशासनिक कर्मचारीहरू तथा विद्यार्थीहरूको उल्लेख्य उपस्थिति रहेको थियो।
स्वागत समारोहमा बोल्दै प्रमुख अतिथि डा. साहले रोयल सफ्टेक कलेजले गुणस्तरीय शिक्षा, अनुशासन र व्यवहारिक सीप विकासलाई प्राथमिकतामा राख्दै आएको उल्लेख गरे। उनले नवआगन्तुक विद्यार्थीहरूलाई लक्ष्यप्रति दृढ रहँदै अध्ययनमा केन्द्रित हुन आग्रह गरे।
त्यसैगरी संस्थापिका अध्यक्ष साहले विद्यार्थीहरूको सर्वाङ्गीण विकासमा कलेज सदैव प्रतिबद्ध रहेको बताउँदै शैक्षिक वातावरणलाई अझ सुदृढ बनाइने विश्वास व्यक्त गरिन्।
कार्यक्रममा सांस्कृतिक प्रस्तुतिहरू, स्वागत मन्तव्य तथा विद्यार्थीहरूको अनुभव आदान–प्रदानले समारोहलाई अझ जीवन्त बनाएको थियो। कलेज प्रशासनले यस्ता कार्यक्रमहरूले विद्यार्थीहरूबीच आत्मीयता र सहयोगको भावना बढाउने विश्वास व्यक्त गरेको छ।