मुसहर समुदायका १० जनाले नागरिकता पाए,४ जनाको प्रक्रिया अगाडि बढदै

महेश सिंह लहान सिरहा-दलित महिला केन्द्र नेपाल (CDWN) र KURVE Wustrowको सहकार्यमा सञ्चालित ‘नेपालमा समावेशी तथा शान्तिपूर्ण समुदायका लागि सशक्तीकरण (सशक्त)’ परियोजना अन्तर्गत गोलबजार नगरपालिका–२, ३, ४ र ५ का मुसहर समुदायका व्यक्तिहरूलाई नागरिकता दिलाउने पहलले ठोस परिणाम दिएको छ।

आज सिरहा जिल्ला प्रशासन कार्यालयमा नागरिकता लिन गएका १४ जनामध्ये १० जनाले नागरिकता प्राप्त गर्न सफल भएका छन्।
तर ४ जनालाई वडा मुचुल्का तथा प्रहरी सोधपुछका लागि पुनः प्रक्रिया पूरा गर्न फिर्ता पठाइएको छ।
परियोजनाले आगामी एक साताभित्र बाँकी रहेका ४ जनाकै नागरिकता पनि प्राप्त गराइने प्रतिबद्धता जनाएको छ। यसअघि समुदायमा कागजात अभाव, प्रक्रिया नबुझ्ने समस्या तथा सामाजिक–प्रशासनिक बाधाका कारण लामो समयदेखि नागरिकता विहीनता चुलिँदै आएको थियो।

CDWN ले स्थानीय तह, प्रहरी प्रशासन र नागरिकता शाखासँगको समन्वयमार्फत
समुदायका कमजोर वर्गलाई राज्यका आधारभूत कागजात उपलब्ध गराउन आफूहरू निरन्तर सक्रिय रहने बताएको छ।
स्थानीयवासी तथा सहभागी परिवारले परियोजनाको पहलले पहिचान, सुविधा तथा अधिकारअनुभूतिको ढोका खुल्दै गएको भन्दै सराहना व्यक्त गरेका छन्।