राजर्षि विश्वविद्यालय सम्बन्धन सहित BBA–BCA सञ्चालन,विद्यार्थी–अभिभावकको उत्साहजनक उपस्थिति

महेश सिंह लहान सिरहा-राजर्षि विश्वविद्यालयबाट सम्बन्ध प्राप्त जे.एस. मुरारका बहुमुखी कलेज, लहानमा यस वर्षदेखि BBA र BCA अध्ययन गराउन थालिएको छ। नयाँ शैक्षिक सत्रमा भर्ना भएका विद्यार्थीहरूलाई कलेजले आइतबार विशेष ओरियेन्टेशन कार्यक्रम आयोजना गरेको छ। करिब तीन घन्टा चलेको उक्त कार्यक्रम विद्यार्थी तथा अभिभावकको उल्लेख्य उपस्थितिसहित सम्पन्न भएको कलेजका प्रिन्सिपल सुमन कुमार साहले जानकारी दिए।

उनका अनुसार कलेजमा दक्ष, अनुभवी तथा विषय–विशेषज्ञ प्राध्यापकद्वारा कक्षाहरू सञ्चालन गरिनेछ। “व्यवस्थापन र सूचना–प्रविधि क्षेत्र दुवैमा विद्यार्थीको माग तीव्र भएकाले कलेजले गुणस्तरीय उच्च शिक्षाको विकल्पका रूपमा यी दुवै कार्यक्रम सुरु गरेको हो,” प्रिन्सिपल साहले बताए।

कार्यक्रमका प्रमुख अतिथि तथा जे.एस. क्याम्पसका प्रमुख सञ्जय कुमार चौधरीले BBA र BCA दुवै कोर्स विद्यार्थीको दीर्घकालीन करियर निर्माणका लागि अत्यन्त उपयोगी हुने उल्लेख गरे। “बैंकिङ, व्यवसाय व्यवस्थापनदेखि सूचना प्रविधिको अन्तर्राष्ट्रिय बजारसम्म अवसर खुला छ। ग्रामीण मधेसका विद्यार्थीले यस्ता विषय पढ्न अब टाढा शहर धाउनुपर्दैन,” उनले भने।

कार्यक्रममा सहायक क्याम्पस प्रमुख सजन कुमार साह, नसा इन्स्टिच्युटका प्रिन्सिपल सञ्जय साह, कन्हैया भट्ट, पप्पु कुमार महतो, अमित यादव, राम कुमार यादवलगायतका शिक्षक तथा सयौं विद्यार्थीहरू सहभागी थिए। कलेजका प्रिन्सिपल साहका अनुसार BCA मा अझै केही सिट खाली रहेको र इच्छुक विद्यार्थीहरूले शीघ्र भर्ना लिन सक्ने व्यवस्था मिलाइएको छ।