विद्यालयमै आत्मरक्षा प्रशिक्षण : अर्नमाका किशोरीहरू व्यवहारिक सीपमा सुदृढ

महेश सिंह लहान सिरहा- अर्नमास्थित पुण्य मदनलाल श्रेष्ठ माध्यमिक विद्यालयमा आज दलित महिला केन्द्र नेपाल (CDWN) र KURVE Wustrowको सहकार्यमा आयोजित किशोरी आत्मरक्षा तालिम सम्पन्न भएको छ। विद्यालय परिसरमा सम्पन्न उक्त प्रशिक्षणमा १०७ जना किशोरी सहभागी भएका थिए।

तालिमका प्रशिक्षक कसम कुमार लामाले सहभागीहरूलाई दैनिक जीवनमा देखिन सक्ने जोखिम, आकस्मिक परिस्थिति पहिचान, शारीरिक–मानसिक तयारी, आत्मविश्वास र सुरक्षा प्रविधि सम्बन्धी व्यवहारिक अभ्याससमेत गराएका थिए। किशोरीहरूलाई आफूलाई जोगाउने आधारभूत दाउपेच, सम्भावित हिंसा वा दुराचारबाट बच्ने उपाय, तथा घटनापछिको तत्कालिक प्रतिक्रिया विधिबारे विस्तृत जानकारी दिइएको थियो।

आयोजक CDWN का प्रतिनिधिहरूका अनुसार आत्मरक्षा तालिम ग्रामीण क्षेत्रका किशोरीहरूलाई सशक्त, सजग र सुरक्षित बनाउने उद्देश्यले सञ्चालन गरिएको हो। विद्यालय प्रशासनले यस्ता कार्यक्रमले विद्यार्थीमा आत्मविश्वास बढाउनुका साथै विद्यालय तथा समुदाय दुवै तहमा सुरक्षा चेतना प्रवर्द्धनमा महत्त्वपूर्ण भूमिका खेल्ने बताएको छ।

स्थानीय समुदायले ठूलो संख्यामा किशोरीको सहभागितालाई सकारात्मक रूपमा लिएको छ। आयोजक संस्थाले आगामी दिनमा यस कार्यक्रमलाई अन्य विद्यालय तथा समुदायमा पनि विस्तार गर्ने तयारी गरेको रिता रजकले जानकारी दिनु भयो।