महेश सिंह लहान सिरहा-कल्याणपुर नगरपालिका–१२ बेला गाउँमा राम जानकारी युवा क्लब, लहान–४ द्वारा वृद्ध, अपाङ्ग, अशक्त, गरिब तथा दलित–अतिविपन्न समुदायका लागि गाउँमै निःशुल्क आँखा उपचार शिविर सञ्चालन गरिएको छ। स्थानीय तहको समन्वय र सहकार्यमा गरिएको यस शिविरमा सगरमाथा चौधरी आँखा अस्पतालको विशेषज्ञ टोलीले सेवा प्रदान गरेको हो।
शिविरका इन्चार्ज राजकुमार यादवले दिनभर सञ्चालन भएको शिविरमा हजारौँ सेवाग्राहीले आँखा परीक्षण, रोग पहिचान तथा आवश्यक परामर्श सेवा प्राप्त गरेको जानकारी दिए। वृद्ध तथा दीर्घरोगीहरूका लागि गाउँमै सेवा उपलब्ध हुँदा स्थानीयवासीले ठूलो राहत पाएको बताइएको छ।
राम जानकारी युवा क्लबका सचिव श्रीराम सत्राले समाजिक उत्तरदायित्वका भावनाबाट क्लब दर्ता गरिएको उल्लेख गर्दै पछिल्ला वर्षहरूमा क्लबले सामुदायिक सेवामा केन्द्रित थुप्रै कार्यक्रम सञ्चालन गर्दै आएको बताए। क्लबका अध्यक्ष शंकर साह रौनियारले “जहाँ समस्या छ, त्यहीँ हाम्रो अग्रणी भूमिका रहन्छ” भन्ने अवधारणाले क्लब अघि बढिरहेको बताए।
शिविरको उद्घाटन सम्बन्धित वडा अध्यक्ष दिलीप यादवले मैनवत्ती बालेर गरे। उद्घाटन समारोहमा वरिष्ठ अधिवक्ता जयकुमार गोईत, स्थानीय स्वास्थ्य प्रमुख सुनिता महतो, पत्रकार महेश सिंहलगायत अतिथिहरूको उपस्थिति रहेको थियो। स्थानीयवासीहरूले शिविरलाई अत्यन्त प्रभावकारी र सराहनीय बताउँदै गाउँस्तरमै गुणस्तरीय स्वास्थ्य सेवा उपलब्ध गराएकोमा आयोजक तथा अस्पताल टोलीप्रति आभार व्यक्त गरेका छन्।
Discussion about this post