महेश सिंह लहान सिरहा –यौन तथा प्रजनन स्वास्थ्य अधिकार (SRHR) सम्बन्धी तीन दिवसीय तालिम शनिबार एक समारोहबीच विधिवत रूपमा समापन गरिएको छ। मुक्ति नेपाल, गोलबजारको आयोजनामा कार्यक्षेत्रभित्र बालविवाहको जोखिममा परेका किशोरी तथा किशोरी समूहका सदस्यहरूलाई लक्षित गर्दै तालिम सञ्चालन गरिएको थियो।
तीन दिनसम्म चलेको तालिममा सहभागी किशोरीहरूलाई आफ्ना अधिकार, यौन तथा प्रजनन स्वास्थ्यको महत्त्व, सुरक्षित किशोरावस्था, निर्णय क्षमता विकास, तथा जीवनोपयोगी सीपसम्बन्धी विस्तृत जानकारी प्रदान गरिएको आयोजक संस्थाले जनाएको छ।
सहभागीहरूले समूहगत अभ्यास, अन्तरक्रिया, प्रस्तुति, अनुभव साझेदारी तथा विविध अतिरिक्त क्रियाकलापमार्फत विषयबस्तु व्यावहारिक रूपमा सिक्ने अवसर पाएका थिए। तालिममा सहभागी अधिकांश किशोरीहरूले आत्मविश्वास वृद्धि, बालविवाहबारे स्पष्ट बुझाइ, तथा जोखिम चिह्नित गर्ने क्षमता विकसित भएको अनुभव सुनाएका थिए।
मुक्ति नेपालले SRHR सम्बन्धी सचेतना अभिवृद्धि, किशोरी सशक्तिकरण तथा बालविवाह न्यूनीकरणलाई निरन्तर अभियानकै रूपमा अघि बढाइने प्रतिबद्धता जनाएकाे छ।
समापन कार्यक्रममा प्रशिक्षक, समुदाय प्रतिनिधि तथा अभिभावकहरूको उल्लेखनीय उपस्थिति थियो।
Discussion about this post