स्थानीय युवाद्वारा सरसफाइका दृश्य सार्वजनिक, वातावरण संरक्षणमा जोड

महेश सिंह सिरहा लहान – मिथिलाको पहिचानको प्रतीक धनुषा मन्दिर परिसरमा सरसफाइ अभियान निरन्तर जारी रहेको छ। स्थानीय युवा समूहको अग्रसरतामा सञ्चालन भइरहेको यस अभियानअन्तर्गत आज पनि मन्दिर क्षेत्र तथा वरपरका सार्वजनिक स्थलहरूमा विस्तृत सरसफाइ कार्य सम्पन्न गरिएको छ।

अभियानका संयोजक समूहले भोलि बिहान ७ बजे पुनः सबै साथी, दाजुभाइ तथा दिदीबहिनीहरूको सहभागिताका लागि सादर अनुरोध गरेको छ। सरसफाइ अभियानलाई निरन्तरता दिन सामुदायिक सहभागिता अपरिहार्य भएको भन्दै सबैलाई सक्रिय हुन आग्रह गरिएको छ।

आजको अभियानका केही दृश्यहरू सार्वजनिक गर्दै टोलीले स्वच्छ वातावरण, स्वस्थ समुदाय निर्माणका लागि नियमित सरसफाइ अत्यावश्यक रहेको बताएको छ। साथै, मिथिलाको पवित्र भूमि धनुषाधाम रहेको धनुषा मन्दिर विश्वकै सांस्कृतिक धरोहर भएकाले यसको संरक्षण र सौन्दर्य व्यवस्थापनमा सबै सरोकारवालाहरूले हातेमालो गर्नुपर्नेमा जोड दिइएको छ।अभियानमा स्थानीय युवा, समाजसेवी, व्यापारी तथा सर्वसाधारणको उल्लेखनीय सहभागिता रहेको छ।