महेश सिंह सिरहा- जिल्ला प्रहरी कार्यालय सिरहामा कार्यरत प्रहरी निरीक्षक दीपक कुमार सिंहको सम्मानपूर्वक बिदाई तथा ‘फेरी भेटौँला’ कार्यक्रम सम्पन्न भएको छ।
सिंहले मिति २०८१ जेठ ६ गते जिल्ला प्रहरी कार्यालय सिरहामा हाजिरी भई निरन्तर रूपमा आफ्नो कार्य सम्पादन गर्दै आएका थिए। उनको निष्ठा, अनुशासन र पेशागत दक्षताले संगठनभित्र अनुकरणीय उदाहरण स्थापित गरेको सहकर्मीहरूले बताएका छन्।
नेपाल प्रहरी प्रधान कार्यालय, मानवश्रोत विकास विभाग, कर्मचारी प्रशासन शाखाको च.नं. २८१७ मिति २०८२ असोज २८ गतेको पत्रादेशअनुसार सिंहलाई इलाका प्रहरी कार्यालय खिजी फलाटे, ओखलढुंगा दरबन्दीमा सरुवा गरिएको हो।
बिदाई कार्यक्रममा जिल्ला प्रहरी कार्यालय सिरहाका प्रहरी अधिकृत तथा कर्मचारीहरूको उपस्थितिमा सिंहको सेवाकालको योगदानको उच्च प्रशंसा गरिएको थियो। वक्ताहरूले उहाँले सिरहामा निर्वाह गरेको इमानदार र प्रभावकारी भूमिकाको स्मरण गर्दै भावनात्मक बिदाई गरेका थिए। कार्यक्रममा सहभागी सहकर्मीहरूले शुभकामना व्यक्त गर्दै भविष्यमा पनि संगठनप्रतिको समर्पण र जनसेवाको भावना निरन्तर रहोस् भन्ने अपेक्षा व्यक्त गरे।
Discussion about this post