सिरहाको लरहामा छह महिनादेखिको सडक अवरोध खुलायो

 महेश सिंह सिरहा- सिरहाको भगवानपुर गाउँपालिका–२  लरहामा करिब छ महिनादेखि अवरुद्ध रहेको स्थानीय सडक अन्ततः खुलेको छ।
वडा अध्यक्ष सूर्य नारायण यादव, गाउँपालिका अध्यक्ष उग्रनारायण यादव, समाजसेवी दुनिया लाल यादव, स्थानीय बासिन्दा तथा युवाहरूको सक्रिय पहलमा दुई दिनको निरन्तर प्रयासपछि सोमबारदेखि सडक पुनः सञ्चालनमा आएको हो।

सडक अवरोधका कारण लरहा र नहरा क्षेत्रका स्थानीयवासीलाई आवागमनमा ठूलो असुविधा हुँदै आएको थियो। विवादको दीर्घकालीन समाधानका लागि सबै पक्षको सहमतिको आधारमा २०८२ मंसिर ६ गते बिहान ८ बजे दोस्रो बैठक बस्ने निर्णय गरिएको वडा सदस्य कृष्ण बन्धु यादवले जानकारी दिए।

स्थानीयवासीहरूले लामो समयदेखि उत्पन्न विवादको अन्त्य भई सडक सञ्चालनमा आउनु सकारात्मक संकेत भएको बताए।
उनीहरूले सामाजिक सहअस्तित्व र आपसी सहकार्यले मात्र विकासका बाटो खुल्ने उल्लेख गर्दै स्थानीय नेतृत्वको भूमिकालाई सराहना गरेका छन्।

तर, समुदायबीच देखिएका स–साना विवाद र अवरोधका घटनाहरूले मधेशका गाउँहरूमा देखिने सामाजिक असहिष्णुता र विकास अवरोधको चिन्ता पनि उजागर गरेको स्थानीयहरू बताउँछन्।
“हाम्रो समाज अझै पनि अनावश्यक विवाद, दादागिरी र व्यक्तिगत स्वार्थमा फस्दै गएको देख्दा दुःख लाग्छ,” एक स्थानीयले भने, “अब भने यस्तो अवस्था दोहोरिनु हुँदैन।”

भगवानपुर गाउँपालिकाका युवापुस्ता र जनप्रतिनिधिहरूले स्थानीय समस्यालाई संवाद र सहमतिको माध्यमबाट समाधान गर्ने प्रतिबद्धता जनाएका छन्।