सखुवानन्कारकट्टीका किसानको पीडा लिएर जनता समाजवादी पार्टीद्वारा ज्ञापनपत्र बुझाइयो

महेश सिंह सिरहा –लगातारको सुख्खा र कमजोर विद्युत आपूर्तिका कारण खेतीप्रति आश्रित सखुवानन्कारकट्टी गाउँपालिकाका किसान गम्भीर संकटमा परेका छन्। पानी, विजुली र सिंचाइको अभावका कारण खेत सुक्न थालेपछि कृषकहरू निराश बनेका छन्। किसानको पीडा लिएर जनता समाजवादी पार्टी, नेपाल (जसपा) गाउँपालिका समिति सखुवानन्कारकट्टीले मंगलबार गाउँपालिका कार्यालयमा ज्ञापनपत्र बुझाउँदै तत्काल समाधानको माग गरेको छ। ज्ञापनपत्रमा भनिएको छ, “श्रावण महिनाको तेस्रो हप्ता बितिसक्दा पनि वर्षा नभएकाले खेतमा खडेरी परेको छ। सिँचाइका लागि प्रयोग गरिने डिप बोरिङ सुकिसकेको छ। पिउने पानीको समेत अभाव हुन थालेको छ। यस्ता परिस्थितिमा किसानले कसरी खेतीपाती गर्ने?”जसपाले ज्ञापनपत्रमार्फत आठवटा प्रमुख मागहरू अघि सारेको छ।कृषि मिटरको वक्यौता रकम तत्काल नेपाल विद्युत प्राधिकरणलाई स्थानीय तहमार्फत भुक्तानी गरिनुपर्ने।खानेपानीको समस्या समाधान गर्न तुरुन्त व्यवस्था मिलाइनुपर्ने।पावर ड्रिल र डिप बोरिङ जडानका लागि गाउँपालिकाले बजेट विनियोजन गर्नुपर्ने।कम भोल्टेज समाधान गर्न गाउँपालिकाभित्र थप ट्रान्सफर्मर जडान गरिनुपर्ने।कृषि विद्युतीकरण अधिकतम खेतसम्म विस्तार गरिनुपर्ने।
जग्गा वर्गीकरण प्रक्रिया तत्काल टुंग्याइनुपर्ने। स्यालो ट्युबेल जडानको मापदण्ड (२ विघा जग्गाको सर्त) संघ तथा प्रदेश सरकारमार्फत खारेज गरिनुपर्ने। सखुवानन्कारकट्टी गाउँपालिकालाई सुख्खा क्षेत्र प्याकेज अन्तर्गत समावेश गर्नुपर्ने।
ज्ञापनपत्र जनता समाजवादी पार्टी गाउँपालिका अध्यक्ष नागेन्द्र कुमार यादवको नेतृत्वमा गाउँपालिकाका प्रमुख प्रशासकीय अधिकृतलाई बुझाइएको हो। जसपा प्रतिनिधिमण्डलले पालिकाले तत्काल कदम चाल्नुपर्ने बताउँदै, संघ र प्रदेश सरकारलाई समेत यस विषयमा चासो दिन आग्रह गरेको छ।
स्थानीय सरकारसँगको बारम्बारको समन्वय र मागपछिसमेत समाधान नआए किसान आन्दोलित बन्ने चेतावनीसमेत उक्त ज्ञापनपत्रमा उल्लेख गरिएको छ।
सिरहाको यो गाउँपलिकामा बहुसंख्यक जनता कृषिमा निर्भर छन्। किसानहरूले खेतमा अन्न फलाउने आधारभूत आवश्यकता—पानी र विजुली नहुँदा जिविकोपार्जनमै गम्भीर असर पर्न थालेको छ। स्थानीय तहले तत्काल समाधान नगरे ठूलो कृषि संकट निम्तिने चिन्ता स्थानीयवासीले व्यक्त गरेका छन्।