महेश सिंह सिरहा –सिरहा जिल्लाको सुखीपुर नगरपालिका–४,पोखरिया स्थित एक घरमा प्रहरीले शुक्रबार बिहान छापा मार्दा ठूलो परिमाणमा गाँजा बरामद भएको छ। जिल्ला प्रहरी कार्यालय सिरहाका अनुसार ६० वर्षीय मेदी यादवको घरमा गरिएको छापामारीबाट ७१७.६ किलोग्राम गाँजा फेला परेको हो।
गोप्य सूचनाका आधारमा जिल्ला प्रहरी कार्यालय सिरहा, प्रहरी चौकी सिलौर्वापछवारी र सशस्त्र प्रहरी बल बेस क्याम्प सुखीपुरबाट खटिएको संयुक्त टोलीले बिहान ६ बजे उक्त घरमा छापा मारेको थियो।
प्रहरीले जानकारी दिएअनुसार गाँजा घरको विभिन्न स्थानमा लुकाएर राखिएको अवस्थामा फेला परेको हो। घटनास्थलबाट को.१३प २१५२ नम्बरको होण्डा मोटरसाइकलसमेत बरामद गरिएको छ।
हाल घटनामा संलग्न व्यक्तिको खोजी र घटनासम्बन्धी थप अनुसन्धान भइरहेको प्रहरीको भनाइ छ। बरामद लागूऔषध तथा मोटरसाइकललाई आवश्यक कानुनी प्रक्रिया पूरा गरी नियन्त्रणमा लिइएको प्रहरी स्रोतले जनाएको छ।
प्रहरीका अनुसार पछिल्लो समय सिरहा जिल्लामा बरामद भएको यो सबैभन्दा ठूलो परिमाणको गाँजा हो। लागूऔषध कारोबार नियन्त्रण गर्न प्रहरीले निगरानी र कारबाहीलाई अझ कडाइका साथ अघि बढाएको जनाएको छ।
Discussion about this post