स्थानीय तहका जनप्रतिनिधिलाई व्यवसायिक शिक्षामा समन्वयका विषयमा प्रशिक्षण

महेश सिंह लहान –स्वीस सरकारको सहयोगमा सञ्चालित नेपाल व्यवसायिक योग्यता प्रणाली परियोजना (NVQS) अन्तर्गत स्थानीय तहमा प्राविधिक तथा व्यावसायिक शिक्षा (TVET) समन्वय समिति गठनका लागि अभिमुखीकरण कार्यक्रम सम्पन्न गरिएको छ।
शिक्षा तथा संस्कृति मन्त्रालय, मधेश प्रदेश सरकारको आयोजनामा लहानस्थित होटल विशालमा आयोजित कार्यक्रममा विभिन्न स्थानीय तहका जनप्रतिनिधि, सरोकारवाला निकायका प्रतिनिधिहरू तथा शिक्षा क्षेत्रका विज्ञहरूको सक्रिय सहभागिता रहेको थियो।
कार्यक्रममा सहभागीहरूलाई व्यवसायिक शिक्षाको क्षेत्रीय समन्वय, TVET प्रणालीको प्रभावकारी कार्यान्वयन, र स्थानीय तहको भूमिका सम्बन्धमा विस्तृत जानकारी प्रदान गरिएको थियो। साथै, भविष्यमा गठन हुने समन्वय समितिको कार्यदायित्व, अधिकार र भूमिकाबारे पनि छलफल गरिएको थियो।
उक्त कार्यक्रम स्वीस सरकार विकास सहयोग (SDC) र Swisscontact को साझेदारीमा सञ्चालित NVQS परियोजनाले सहयोग गरेको हो। यस परियोजनामार्फत युवाहरुलाई सीपमूलक शिक्षा प्रदान गर्दै रोजगारीका अवसरहरू सिर्जना गर्ने उद्देश्य लिइएको छ।
CTEVT तथा मधेश प्रदेश सरकारको सहकार्यमा सञ्चालित कार्यक्रमले स्थानीय स्तरमा व्यवसायिक शिक्षाको विकासमा नयाँ आधार तयार गर्ने अपेक्षा गरिएको छ।