लहानमा महिलाको पहिचानका लागि ‘आभाशा अभियान’ सुरु

‘आसनमा महिला, भाषणमा महिला, शासनमा महिला’ नारासहित आठदिने सचेतनामूलक 

महेश सिंह लहान –लैंगिक समानता र समावेशी समाज निर्माणका लागि सिरहाको लहानमा ‘आभाशा अभियान’ सञ्चालन गरिएको छ। ‘आसनमा महिला, भाषणमा महिला, शासनमा महिला’ भन्ने नारासहित सुरु गरिएको अभियानको मूल उद्देश्य महिलालाई आफ्नै नामबाट पहिचान दिलाउनु हो।

कोशी प्रदेशबाट सुरु गरिएको अभियान सप्तरीको राजविराज हुँदै सिरहाको लहान पुगेको हो। आठ दिनसम्म मधेस प्रदेशका आठ जिल्लामा सचेतनामूलक कार्यक्रम सञ्चालन गरिने नजबुल फाउन्डेसन नेपालकी अध्यक्ष तथा अभियानी नजबुल खातुनले जानकारी दिइन्।
लहानमा आयोजित कार्यक्रममा नगर प्रमुख महेश प्रसाद चौधरीले महिलाको आत्मबल बढाउने खालका अभियान समाजमा सकारात्मक सन्देश दिन सफल भएको बताए। “घुँघटभित्र सीमित महिलाहरूको आवाज बुलन्द बनाउन यस्तो अभियानले मद्दत पुर्‍याएको छ,” उनले भने। “महिलाको सामाजिक, राजनीतिक र प्रशासनिक पहुँच वृद्धि गर्न यस्ता अभियान अपरिहार्य छन्।”
कार्यक्रम संयोजक मदिना मन्जरीले महिलाहरूलाई आफ्नै पहिचानमा आत्मनिर्भर बनाउन ‘आभाशा अभियान’को थालनी गरिएको बताइन्। “महिलाले आफूलाई पहिचान दिँदा समाजको सोच परिवर्तन गर्न सकिन्छ,” उनले भनिन्।
‘जय आभाशा’ नारासहित सञ्चालित अभियानमा CDWN Nepal, 7 Pillars of Nepal, दलित जनकल्याण युवा क्लब र जनकल्याण बी लगायत संस्थाहरूको सहकार्य रहेको थियो।
रिता परियार, रोशन खातुन, प्रभा नायकलगायत सयौं अभियानी महिलाहरूको उपस्थिति रहेको कार्यक्रममा सहभागिनीहरूले अधिकारका सवालमा अझ सशक्त आवाज उठाउने प्रतिबद्धता जनाएका थिए। लहान नगरपालिकाको समन्वयमा सम्पन्न कार्यक्रमले महिलाको पहिचान, हक र अधिकारप्रति स्थानीय तहमा चेतना फैलाउने अपेक्षा गरिएको छ।