महेश सिंह लहान, सिरहा – लामो समयदेखि शिक्षाक्षेत्रमा क्रियाशील लहान–३ स्थित रोयल सफ्टेक कलेजले १४२ जना विद्यार्थीलाई अध्ययनका लागि ७८ लाख रुपैयाँ बराबरको छात्रवृत्ति प्रदान गरेको छ। छात्रवृत्तिको व्यवस्था लहान सिटी जेसिजको पहलमा गरिएको हो।

लहान सिटी जेसिजका वर्तमान अध्यक्ष देवन लाल ठाकुरको अथक प्रयासपछि कलेज र जेसिजबीच लिखित समझदारी हुँदै छात्रवृत्तिको वितरण सुनिश्चित गरिएको हो। कलेजका संस्थापक तथा प्रिन्सिपल डा. महादेव साहका अनुसार आर्थिक रूपमा कमजोर, दलित, जेहेन्दार तथा सीमान्तकृत समुदायका विद्यार्थीलाई उच्च शिक्षामा पहुँच सुनिश्चित गर्ने उद्देश्यले छात्रवृत्ति प्रदान गरिएको हो।

छात्रवृत्ति हस्तान्तरण कार्यक्रममा जेसिजका पूर्व अध्यक्ष बसन्त साह, मुरारी साह, फिरोज शेख, महासचिव बमचन्द्र चौधरीसहित दर्जनौँ अतिथिहरुको उपस्थिति रहेको थियो।

डा. साहले भने, “हाम्रो लक्ष्य साक्षर नेपाल निर्माणमा टेवा पुर्‍याउनु हो। नेपाल सरकारले सन् २०३० सम्म पूर्ण साक्षरताको लक्ष्य लिएको छ, र हामी त्यसैको साझेदार बन्न चाहन्छौँ।”

सिरहा जिल्लामा उच्च शिक्षाको पहुँच विस्तार गर्ने उद्देश्यले रोयल सफ्टेक कलेजले पछिल्लो समय सामाजिक उत्तरदायित्व अन्तर्गत शिक्षा पहुँचविहीन वर्गका विद्यार्थीलाई प्राथमिकतामा राख्दै आएको छ।