विद्यालयमा विभेदपूर्ण सम्मान?

महेश सिंह लहान–रघुनाथपुरस्थित लक्ष्मण ललिता कुशवाहा माध्यमिक विद्यालयको ५० औं स्वर्ण जयन्ती कार्यक्रममा जग्गा दाताहरूमाथि विभेद भएको गुनासो उठेको छ। विद्यालयलाई चार कठ्ठा जग्गा दान गरेका स्व. रामदेव महतोका नाति विजय कुमार महतोले आफूलाई मञ्चमा अन्य अतिथिहरूसँग समान सम्मान नदिइएको आरोप लगाएका छन्।
विजयलाई विशिष्ट अतिथिको रूपमा निमन्त्रणा दिइए पनि कार्यक्रममा मञ्चमा आसन नदिइएको उनको गुनासो छ। “कार्यक्रममा उपस्थित त भएँ, तर अन्य विशिष्ट अतिथिसरह सम्मान पाइएन,” उनले भने, “पछि सामान्य अतिथिका रूपमा बस्न भनियो।”
उनका अनुसार स्व. रामदेव महतोले विद्यालयलाई दान दिएको जग्गाको हालको बजार मूल्य २.५ देखि ३ करोडसम्म छ। “हामीले सालिक बनाउने प्रस्ताव राख्यौँ, तर विद्यालयले चासो देखाएन,” उनले भने, “उही समयमा अर्का दाताको सालिक भने बनाइँदै छ।”
विद्यालय प्रशासनले भने सबै निर्णय संस्थागत प्रक्रिया अनुसार हुने दाबी गरेको छ। व्यवस्थापन समिति अध्यक्ष महेश्वर कुशवाहाले कार्यक्रम र स्मारिका तयारीमा कसैसँग विभेद नगरेको दाबी गरे। “सबै निर्णय समिति बैठकबाटै भएको हो,” उनले भने, “सालिक निर्माणको प्रस्तावसमेत समिति समक्ष आएको छैन।”
तर, विजय महतोको भनाइमा विद्यालयले विगतदेखि नै लक्ष्मण–ललिता कुशवाहा परिवारलाई प्राथमिकता दिँदै आएको र अन्य दाताको योगदान ओझेलमा पार्ने काम गर्दै आएको छ।
स्मारिकाको शिलालेखमा समेत ‘विद्यालय परिवार’ लेखिनुको सट्टा विशिष्ट व्यक्तिका नाम मात्र उल्लेख गरिएको भन्दै अन्य दाताहरूले आपत्ति जनाएका छन्। उनीहरूको माग छ– “विद्यालय सबै दाताको योगदानलाई समानरूपमा प्रस्तुत गरोस्।”
यसअघि पनि विद्यालयको नामाकरणका विषयमा विवाद उठेको थियो। त्यसबेला आन्दोलनमा संलग्न भएको आरोपमा महतो परिवारका सदस्य पक्राउ समेत परेका थिए।
विद्यालय प्रशासनले भने सबै कुरा सामूहिक निर्णय अनुसार भएको दोहोर्याउँदै आएको छ। तर, यस्ता विवाद दोहोरिनु विद्यालयको छवि र सामुदायिक सम्बन्धमा असर पार्न सक्ने विज्ञहरू बताउँछन्।