महेश सिंह लहान – सिरहाको लहान नगरपालिका-३ मा रहेको लहान एडभान्स अस्पतालप्रति सामाजिक सञ्जालमा भ्रामक सूचना फैलिएको भन्दै अस्पताल प्रशासनले आपत्ति जनाएको छ।
अस्पतालका अध्यक्ष डा. वीरेन्द्र यादवका अनुसार हाल सामाजिक सञ्जालमा भाइरल भइरहेको एउटा भिडियो झण्डै एक वर्ष पुरानो हो, जसलाई केही समूहले गलत उद्देश्यसहित प्रचार गरिरहेका छन्। “अस्पतालको छवि धमिल्याउने नियतले भ्रम फैलाउने काम भइरहेको छ,” उनले भने, “सत्यतथ्यबिना कुनै पनि समाचार वा सामग्री शेयर गर्दा सचेत रहनु आवश्यक छ।”
अस्पताल प्रशासनले हालसम्म कुनै अप्रिय घटना नभएको प्रस्ट्याउँदै सर्वसाधारणलाई यस्ता भ्रामक प्रचारमा नपर्न आग्रह गरेको छ। “हामी गुणस्तरीय सेवा प्रदान गर्दै आएका छौं। विशेष गरी आर्थिक रूपमा कमजोर तथा पीडित बिरामीलाई प्राथमिकतामा राखेर उपचार गर्दै आएका छौं,” अस्पताल व्यवस्थापनले जनाएको छ।
स्थानीयवासीले समेत लहान एडभान्स अस्पतालले गुणस्तरीय सेवा दिँदै आएको उल्लेख गर्दै भ्रामक प्रचारबाजीप्रति चिन्ता व्यक्त गरेका छन्। अस्पताल प्रशासनले सत्यतथ्य बिना अफवाह नफैलाउन सबैलाई आग्रह गर्दै भ्रामक सामग्री फैलाउनेहरूमाथि कानुनी कारबाहीको चेतावनीसमेत दिएको छ।
Discussion about this post