महेश सिंह लहान – सिरहाको नवराजपुर गाउँपालिका १ भगवतीपुरमा माघ २७ गते राति एक दलित समुदायकी युवतीमाथि बलात्कार भएको छ। तर, कानुनी प्रक्रिया अघि बढाउने साटो गाउँमै पञ्चायती मिलापत्र गराउने प्रयास भएको स्थानीयवासीले बताएका छन्।
पञ्चायती निर्णयअनुसार दोषीलाई १ लाख ५० हजार रुपैयाँ जरिवाना तिर्ने फैसला गरिएको थियो। तर, जरिवाना रकम बाँडफाँटका विषयमा पञ्चहरूबीच विवाद भएपछि गाउँमै झगडा भएको थियो।
हिजो साँझ घरका अन्य सदस्यहरू बाहिर रहेका बेला युवती कोठाभित्र झुन्डिएको अवस्थामा फेला परेकी छन्। परिवारका सदस्यहरू फर्किंदा घरको ढोका बाहिरबाट चुकुल लागेको थियो। युवतीले आत्महत्या गरेको दाबी गरिए पनि घटनालाई नियोजित हत्या हुनसक्ने आशंका गरिएको छ।युवतीको शव लहान अस्पतालमा राखिएको छ भने भोलि पोस्टमार्टमका लागि अन्यत्र पठाउने तयारी भइरहेको छ।
पीडित पक्षले घटनाको निष्पक्ष छानबिन गर्दै दोषीलाई कडा कारबाही गर्न माग गरेका छन्। स्थानीयवासीहरूका अनुसार, घटना बाहिर आउन नदिन दबाब दिने प्रयास भइसकेको छ।
यस्तो गम्भीर घटनामा प्रशासन र स्थानीय सरकार किन मौन छन्? कानुनी प्रक्रिया अघि बढाउनुको सट्टा गाउँमै पञ्चायती मिलापत्र गराउने प्रवृत्तिले न्याय अन्योलमा पर्ने मानव अधिकारकर्मीहरूको चिन्ता छ।
पीडित परिवार र स्थानीय अधिकारकर्मीहरूले घटनाको निष्पक्ष छानबिन गरी दोषीलाई कानुनी दायरामा ल्याउन माग गरेका छन्। घटनालाई गम्भीर रूपमा नलिए स्थानीयस्तरबाट आन्दोलन चर्काइने चेतावनी समेत दिइएको छ। सरकार र प्रशासनले न्याय सुनिश्चित नगर्ने हो भने यस्ता घटनाहरू पुनः दोहोरिने स्थानीय बासिन्दाहरूको भनाइ छ।
Discussion about this post