बाल विवाह रोकथामका लागि गोलबजारमा अन्तरक्रिया, स्थानीय तह र समुदायको सहकार्य आवश्यक

महेश सिंह सिरहा- बाल विवाह रोकथाम र लैङ्गिक हिंसा न्यूनीकरणका लागि गोलबजार नगरपालिकामा सरोकारवालाबीच अन्तरक्रिया कार्यक्रम सम्पन्न भएको छ। कार्यक्रममा नगरप्रमुख श्यामकुमार श्रेष्ठले बाल विवाह र लैङ्गिक हिंसा नियन्त्रणका लागि स्थानीय सरकार, प्रहरी प्रशासन, सामाजिक संघसंस्था तथा समुदायको संयुक्त पहल अपरिहार्य रहेको बताए।

कार्यक्रममा सहभागीहरूले बाल विवाह रोक्नका लागि शिक्षामा लगानी वृद्धि, अभिभावक सचेतना, कानूनी कार्यान्वयनमा कडाइ, जनचेतनामूलक अभियान सञ्चालन, तथा आर्थिक रूपमा कमजोर परिवारलाई आत्मनिर्भर बनाउन विशेष कार्यक्रम ल्याउनु आवश्यक रहेको निष्कर्ष निकाले।
बाल विवाहका प्रमुख कारणहरूमा गरिबी, अभिभावकको कानूनी अज्ञानता र परम्परागत सोच रहेको चर्चा गर्दै सहभागीहरूले प्रभावकारी कानूनी कार्यान्वयनको अभावले ग्रामीण क्षेत्रमा अझै पनि यो समस्या जटिल रहेको बताएका छन्।

महिला अधिकार र लैङ्गिक समानताको क्षेत्रमा काम गर्ने संघसंस्था तथा अभियन्ताहरूले सत्य-तथ्यमा आधारित पैरवी अभियान आवश्यक रहेको बताए। लैङ्गिक विभेदमा आधारित हिंसा (GBV) न्यूनीकरणका लागि न्यायमा पहुँच सुनिश्चित गर्दै दिगो शान्ति स्थापना गर्ने रणनीति अघि सार्नुपर्ने उनीहरूको भनाइ थियो।
नगरपालिकाले जनचेतना कार्यक्रमलाई निरन्तरता दिने प्रतिबद्धता जनाएको छ। “समस्या समाधानका लागि सामूहिक प्रयास आवश्यक छ,” नगरप्रमुख श्रेष्ठले भने, “स्थानीय सरकार, प्रहरी, सामाजिक संघसंस्था र समुदायबीच सहकार्य गरेर बाल विवाह न्यूनीकरण गर्न प्रभावकारी पहल गरिनेछ।”
कार्यक्रममा विभिन्न वडाका जनप्रतिनिधि, महिला समूहका प्रतिनिधि, सामाजिक अभियन्ता, संचारकर्मी तथा स्थानीय बासिन्दाहरूको उपस्थिति रहेको थियो। सहभागीहरूले यस्ता अन्तरक्रिया कार्यक्रमहरूलाई निरन्तरता दिनुपर्ने माग गरेका छन्।