लहान नगरपालिका मा सत्ताको दम्भ ! उप–प्रमुखको गाडी खोस्ने निर्णय उल्ट्याउँदै केन्द्रले दियाे कडा निर्देशन

महेश सिंह लहान,सिरहा, लहान नगरपालिकामा प्रमुख र उप–प्रमुखबीच लामो समयदेखि जारी विवाद अहिले झनै गम्भीर बनेको छ। उप–प्रमुख रामचलित्तर महतोले प्रयोग गर्दै आएको सरकारी गाडी तथा अन्य सेवा सुविधालाई मनपरी ढंगले कटौती गरिएको विषयमा परेको उजुरीपछि राष्ट्रिय सतर्कता केन्द्रले कडा निर्देशन जारी गरेको छ। वि.सं. २०८२/११/११ को सचिवस्तरीय निर्णयअनुसार केन्द्रले नगर कार्यपालिकाको कार्यालय, लहान नगरपालिका, सिराहालाई तत्काल उप–प्रमुखलाई पदीय मर्यादाक्रमबमोजिम सवारी साधन उपलब्ध गराउन आदेश दिएको हो।
उप–प्रमुखले चढ्दै आएको सरकारी गाडी नगर प्रमुख महेश चौधरीको इसारामा प्रमुख प्रशासकीय अधिकृत जयकान्त झाले बिच बजारबाटै खोसेर नियन्त्रणमा लिएको आरोप छ। नगरपालिकामा उपलब्ध सवारी साधन अन्य कर्मचारीले प्रयोग गरिरहेको तर पदीय मर्यादाक्रममा दोस्रो स्थानमा रहेका उप–प्रमुखलाई सुविधा नदिइएको विषयलाई केन्द्रले गम्भीर रूपमा लिएको छ।
मधेश प्रदेशको स्थानीय तहका पदाधिकारी तथा सदस्यले पाउने सुविधा सम्बन्धी ऐन, २०७७ को दफा ४ मा उप–प्रमुखलाई यातायात सुविधा, सञ्चार सुविधा तथा अतिथि सत्कार सुविधा पाउने स्पष्ट व्यवस्था रहे पनि त्यसको अवज्ञा गरिएको देखिएको छ। स्थानीय सरकार सञ्चालन ऐन, २०७४ अनुसार उप–प्रमुखलाई आफ्नो जिम्मेवारी निर्वाह गर्न आवश्यक साधन उपलब्ध गराउनुपर्ने कानुनी प्रावधान रहेको छ।
राष्ट्रिय सतर्कता केन्द्रले यसअघि समेत विभिन्न मितिमा पत्राचार गरेको उल्लेख गर्दै अब ढिलाइ नगरी निर्देशन कार्यान्वयन गर्न आग्रह गरेको छ। नगर प्रमुख र उप–प्रमुखबीचको विवादले लहान नगरपालिकाको प्रशासनिक कार्यसम्पादनमै प्रश्न उठाएको छ। सतर्कता केन्द्रको स्पष्ट निर्देशनपछि अब नगरपालिकाले कानुनको पालना गर्छ कि पुनः मनपरी शैलीलाई निरन्तरता दिन्छ भन्ने विषयमा स्थानीयवासीको चासो बढेको छ।