सखुवानान्कारकट्टी–१ भौउरमा रामसुन्दर चौधरीको चुनावी सभा

महेश सिंह लहान सिरहा – रामसुन्दर चौधरीले निर्वाचन क्षेत्र नम्बर–१ अन्तर्गत सखुवानान्कारकट्टी गाउँपालिका–१ भौउरमा चुनावी सभा तथा घरदैलो कार्यक्रम सम्पन्न गरेका छन्। स्थानीय काङ्ग्रेस नेता तथा वडा सभापति बासुदेव यादवको अध्यक्षता र युवा नेता सन्तोष कुमार यादवको नेतृत्व तथा पहलमा कार्यक्रम आयोजना गरिएको हो।
सभामा प्रमुख अतिथिका रूपमा सम्बोधन गर्दै उम्मेदवार चौधरीले काङ्ग्रेसको चुनाव चिह्न ‘रुख’लाई आफ्नै चिन्ह सम्झेर मतदान गर्न आह्वान गरे। उनले निर्वाचनमा सक्रिय सहयोग गर्न नेता–कार्यकर्तालाई आग्रह गर्दै काङ्ग्रेसको जितले लोकतान्त्रिक मूल्य–मान्यताको सुदृढीकरण हुने दाबी गरे।
चौधरीले देशमा भएका राजनीतिक परिवर्तनमा नेपाली कांग्रेसको भूमिका उल्लेखनीय रहेको चर्चा गर्दै अन्य दलको प्रभावमा नपर्न आग्रह गरे। “काङ्ग्रेस विजयी भएमा तपाईंहरूको गर्व र मान–सम्मान बढ्नेछ,” उनले भने, “अबको काङ्ग्रेस पुरानोभन्दा फरक र रूपान्तरित काङ्ग्रेस हो, जसले देशलाई निकास दिन सक्छ।”
कार्यक्रममा बोल्दै वडा सभापति यादवले रामसुन्दर चौधरीजस्ता इमानदार नेताको नेतृत्व दुर्लभ हुने उल्लेख गर्दै उनको विजय सम्पूर्ण क्षेत्रवासीको विजय हुने बताए। उनले घरदैलो अभियानलाई अझ सशक्त बनाउने प्रतिबद्धता जनाए।
उक्त कार्यक्रममा लहान नगर सभापति संजय कुमार यादव, समानुपातिक उम्मेदवार उषा राउत, सुनिल महतो लगायत नेता–कार्यकर्ताको उल्लेखनीय उपस्थिति रहेको आयोजकले जनाएको छ।