नवराजपुर १ मा घरदैलोमै पार्टी प्रवेश कार्यक्रम, कांग्रेस पक्षमा बढ्दो जनसमर्थन

महेश सिंह, लहान — सिरहा निर्वाचन क्षेत्र नम्बर–२ मा नेपाली काङ्ग्रेस का उम्मेदवार रामचन्द्र यादवको चुनावी अभियान दिनप्रतिदिन सशक्त बन्दै गएको छ। विशेषगरी ग्रामीण भेगमा देखिएको जनलहरले कांग्रेसको पक्षमा माहोल झन् अनुकूल बन्दै गएको स्थानीय राजनीतिक वृत्तको विश्लेषण छ।
सिरहाको नवराजपुर गाउँपालिका–१ तामासुईया, गेरुवाहा र कर्मनिया क्षेत्रमा आयोजित घरदैलो कार्यक्रममा स्थानीय स्तरका नेता–कार्यकर्ताले जनमत पार्टी परित्याग गरी नेपाली काङ्ग्रेसमा प्रवेश गरेका छन्। करिब सयौँको संख्यामा युवादेखि ज्येष्ठ नागरिकसम्मको सहभागिता रहेको उक्त कार्यक्रममा नवप्रवेशीहरूले रामचन्द्र यादवलाई विजयी गराउने प्रतिबद्धता व्यक्त गरेका छन्।
नवप्रवेशीहरूलाई पार्टीमा स्वागत गर्दै उम्मेदवार यादवले लोकतन्त्रको संस्थागत सुदृढीकरण, पारदर्शी शासन व्यवस्था र दिगो विकास आफ्नो मूल एजेन्डा रहेको स्पष्ट पारे। “जनताको अधिकारको रक्षा, समावेशी सहभागिता र आर्थिक समृद्धि बिना समुन्नत समाज सम्भव छैन,” उनले भने, “कांग्रेसले इतिहासदेखि नै लोकतन्त्र र नागरिक स्वतन्त्रताको रक्षा गर्दै आएको छ, अब विकासको नयाँ अध्याय सुरु गर्ने समय आएको छ।”
कार्यक्रममा स्थानीय नेता–कार्यकर्ताको उल्लेख्य उपस्थिति रहेको थियो। सहभागीहरूले शिक्षा, स्वास्थ्य, कृषि आधुनिकीकरण, सिंचाइ विस्तार तथा सडक पूर्वाधार निर्माणलाई प्राथमिकतामा राख्नुपर्ने धारणा राखेका थिए। विशेषगरी युवा तथा किसान वर्गले रोजगारी सिर्जना र बजार व्यवस्थापनलाई प्रमुख एजेन्डा बनाउन सुझाव दिएका छन्।
यसैबीच, क्षेत्रीय सम्पर्क कार्यालय उद्घाटनसँगै घरदैलो कार्यक्रमलाई थप तीव्रता दिइएको छ। यादवले टोल–टोलमा पुगेर मतदातासँग प्रत्यक्ष संवाद गर्दै जनचाहना बुझ्ने र तत्काल सम्बोधन गर्ने रणनीति अपनाएका छन्। स्थानीय बासिन्दासँगको संवादमा उनले विकास योजनालाई कार्यान्वयनमुखी बनाउने प्रतिबद्धता दोहोर्‍याएका छन्।
पछिल्लो समय विभिन्न दल परित्याग गरी कांग्रेसमा प्रवेश गर्ने क्रम बढ्दै जाँदा सिरहा–२ मा चुनावी समीकरण कांग्रेसको पक्षमा उभिँदै गएको स्थानीय विश्लेषकहरूको भनाइ छ। राजनीतिक रूपमा प्रतिस्पर्धी क्षेत्र मानिने सिरहा–२ मा यस पटकको निर्वाचन निकै रोचक बन्ने आकलन गरिएको छ।