महेश सिंह लहान, सिरहा- लोटस युनिक एकेडेमी, लहानद्वारा आयोजित अभिभावक दिवस–२०८२ तथा शैक्षिक प्रदर्शनी मेला एवं विज्ञान प्रदर्शनी कार्यक्रम भव्य रूपमा सम्पन्न भएको छ। विद्यालयका निर्देशक भगवती चौधरीको अध्यक्षतामा कार्यक्रम सुरु भएको थियो।
कार्यक्रमका प्रमुख अतिथि लहान नगरपालिकाका नगर प्रमुख महेश प्रसाद चौधरीले विद्यार्थी नै भोलिका कर्णधार भएको उल्लेख गर्दै गुणस्तरीय शिक्षा प्रदान गर्दै आएको विद्यालय परिवारप्रति आभार व्यक्त गरे। उनले शिक्षामा विकास नभएसम्म देश, समाज र नगरको समग्र विकास सम्भव नहुने बताउँदै सहभागी अभिभावकहरूलाई शिक्षा क्षेत्रमा सक्रिय सहयोग र चासो दिन ध्यानाकर्षण गराए।
विद्यालयका प्रिन्सिपल लक्ष्मण चौधरीका अनुसार आधुनिक युगमा विद्यार्थीभित्र रहेको प्रतिभालाई निखार्दै उच्च मनोबल विकास गराउने उद्देश्यले शैक्षिक मेला तथा विज्ञान प्रदर्शनी आयोजना गरिएको हो। प्रदर्शनीमा विद्यार्थीहरूले विभिन्न शैक्षिक सामग्री, विज्ञानका प्रयोगात्मक नमूना तथा नवप्रवर्तनात्मक परियोजना प्रस्तुत गरेका थिए।
यसैगरी, विद्यार्थीहरूले आफ्नो कला, संस्कृति, नृत्य तथा समसामयिक विषयवस्तुमा आधारित प्रस्तुतिहरू प्रदर्शन गरेका थिए। जेन्जी आन्दोलनका घाइते र आन्दोलनका दृश्य चित्रणसमेत प्रदर्शनीमा समेटिएको थियो, जसले कार्यक्रमलाई थप सन्देशमूलक बनाएको थियो।
कार्यक्रममा सहभागी सम्पूर्ण अतिथि तथा अभिभावकहरूलाई विद्यालय परिवारले गम्छा र टीका लगाएर सम्मान गरेको थियो। साथै, कक्षा टप गर्ने उत्कृष्ट विद्यार्थीहरूलाई प्रशंसापत्र प्रदान गर्दै विशेष सम्मान गरिएको विद्यालयले जनाएको छ।
हजारौँ अभिभावक, विद्यार्थी तथा सरोकारवालाको उल्लेखनीय सहभागिताबीच कार्यक्रम सौहार्दपूर्ण वातावरणमा सम्पन्न भएको थियो। विद्यालयले आगामी दिनमा पनि यस्ता सिर्जनात्मक तथा प्रेरणादायी कार्यक्रमलाई निरन्तरता दिने प्रतिबद्धता व्यक्त गरेको छ।
Discussion about this post