औरही–५ मा काङ्ग्रेसको घरदैलो अभियान तीव्र, उम्मेदवार रामचन्द्र यादवको सुशासन प्रतिवद्धता

महेश सिंह, लहान (सिरहा) — सिरहाको औरही गाउँपालिका–५ मा नेपाली काङ्ग्रेसले घरदैलो कार्यक्रमलाई तीव्रता दिएको छ। सिरहा निर्वाचन क्षेत्र नम्बर–२ का काङ्ग्रेस उम्मेदवार रामचन्द्र यादव ले घरदैलो अभियानका क्रममा काङ्ग्रेसको ऐतिहासिक पृष्ठभूमि र लोकतान्त्रिक योगदानबारे स्मरण गराउँदै यसपटक पनि औरही काङ्ग्रेसकै गढ हुने दाबी गरेका छन्।
घरदैलोका क्रममा उनले २००३ सालदेखि लोकतान्त्रिक आन्दोलनको अगुवाइ गर्दै आएको नेपाली काङ्ग्रेस ले संविधानको रक्षा, जनताको अधिकार संरक्षण र सुशासन स्थापनालाई प्राथमिकतामा राख्दै आएको बताए। “मेरो उम्मेदवारी संविधान, लोकतन्त्र र जनताको सुरक्षाका लागि हो,” उनले भने, “पहिला जनताको रक्षा, त्यसपछि विकास निर्माणमा तीव्रता दिन्छु।”
यादवले निर्वाचनपछि पनि जनताकै बीचमा रहेर काम गर्ने प्रतिबद्धता दोहोर्‍याउँदै शिक्षा, स्वास्थ्य, रोजगारी सिर्जना र पूर्वाधार विकासलाई मुख्य एजेन्डा बनाएको जानकारी दिए। उनले क्षेत्रको समग्र विकासका लागि दीर्घकालीन योजना तयार पार्ने र युवालाई रोजगारीसँग जोड्ने पहल गर्ने उल्लेख गरे।
घरदैलो कार्यक्रममा स्थानीय बासिन्दा तथा समर्थकहरूको बाक्लो उपस्थिति देखिएको थियो। मोथियाहीसहित आसपासका बस्तीमा पुगेर उनले मतदातासँग प्रत्यक्ष संवाद गर्दै सुझाव र गुनासा सुनेका थिए।
स्थानीयवासीका अनुसार यादव जनतासँग सहज रूपमा घुलमिल हुने र समस्या समाधानमा चासो राख्ने नेता हुन्। कार्यक्रममा सहभागी समर्थकहरूले यसपटक काङ्ग्रेसलाई विजयी गराउने प्रतिबद्धता व्यक्त गरेका थिए।
निर्वाचन नजिकिँदै जाँदा सिरहा–२ मा काङ्ग्रेसको चुनावी गतिविधि थप सक्रिय बन्दै गएको छ भने उम्मेदवार यादवको घरदैलो अभियानले चुनावी माहोललाई अझ तातो बनाएको छ।