सप्तरी–४ मा राप्रपा उम्मेदवार रुपकुमार न्यौपानेको चुनावी दौड तीव्र

महेश सिंह लहान –सप्तरी निर्वाचन क्षेत्र नम्बर–४ मा राष्ट्रिय प्रजातन्त्र पार्टीका उम्मेदवार रुपकुमार न्यौपानेले चुनावी अभियानलाई तीव्रता दिएका छन्। विशेषगरी बोदेबरसाईन नगरपालिका–९ देउरीसहित आसपासका बस्तीमा घरदैलो कार्यक्रम गर्दै उनी मतदातासँग प्रत्यक्ष संवादमा जुटेका छन्।
घरदैलोका क्रममा न्यौपानेले देशमा राजनीतिक अस्थिरता, बेरोजगारी, भ्रष्टाचार र आर्थिक संकट बढ्दै गएको उल्लेख गर्दै वैकल्पिक राजनीतिक शक्तिको आवश्यकता औंल्याएका छन्। “राजा आउ, देश बचाउ” नारासहित उनले सुशासन, समृद्धि र राष्ट्रिय पहिचानको संरक्षणलाई आफ्नो प्रमुख एजेन्डा बनाएका छन्। सनातन धर्मको संरक्षण र नेपाललाई पुनः हिन्दू राष्ट्रका रूपमा स्थापना गर्ने विषयमा जनमत निर्माण आवश्यक रहेको उनको भनाइ छ।
उनले कृषक, युवा र साना व्यवसायीका समस्यालाई प्राथमिकतामा राख्ने प्रतिबद्धता जनाएका छन्। कृषि उत्पादनको उचित मूल्य सुनिश्चित गर्ने, सिँचाइ र मलबीउ व्यवस्थापनमा सुधार ल्याउने तथा स्थानीयस्तरमै रोजगारी सिर्जना गर्ने योजनाबारे उनले मतदातालाई जानकारी दिएका छन्।
न्यौपानेले ‘हलो’ चुनाव चिन्हमा मतदान गर्न आग्रह गर्दै विदेशी प्रभाव र दलाली प्रवृत्तिबाट देशलाई मुक्त गर्नुपर्ने धारणा व्यक्त गरेका छन्। उनका समर्थकहरूका अनुसार सप्तरी–४ मा धार्मिक आस्था बोकेका तथा इमानदार छविका उम्मेदवारका रूपमा उनीप्रति आकर्षण बढ्दै गएको छ।
यता, अन्य राजनीतिक दलका उम्मेदवारहरू पनि आ–आफ्ना एजेन्डासहित चुनावी मैदानमा सक्रिय छन्। निर्वाचन मिति नजिकिँदै जाँदा सप्तरी–४ मा चुनावी सरगर्मी बढेको छ। मतदाताहरू विकास, सुशासन र स्थायित्वका मुद्दालाई केन्द्रमा राख्दै उम्मेदवारको मूल्यांकनमा जुटेका छन्।