शव हराएको घटनाको सत्य सार्वजनिक गर्न माग गर्दै गोलबजारमा पीडित परिवारको सडक अवरोध

महेश सिंह लहान सिरहा – गोलबजार नगरपालिका–३, जमदहकी निशा बानियाँको रहस्यमय घटनापछि शव नै हराएको विषयलाई लिएर पीडित परिवारले कडा आन्दोलन सुरु गरेका छन्। घटनाको सत्य तत्काल सार्वजनिक गर्न, शव अविलम्ब खोजी गर्न तथा दोषीमाथि कडा भन्दा कडा कारबाहीको माग गर्दै पीडित परिवार तथा स्थानीयवासीले गोलबजारको लोकमार्ग अवरोध गर्दै प्रदर्शन गरेका हुन्।
निशा बानियाँको शव पोस्टमार्टमका लागि लहानस्थित अस्पताल लगिएको भए पनि अस्पताल परिसरबाटै शव हराएपछि घटना झनै गम्भीर र शंकास्पद बनेको छ। लामो समयदेखि बाल क्लबदेखि सामाजिक कुसंस्कारविरुद्ध सक्रिय रूपमा अभियान चलाउँदै आएकी निशा आफैँ यसरी पीडित बन्नुपर्छ भन्ने कल्पनासमेत नगरिएको भन्दै परिवारजन भावुक बनेका छन्।
पीडित परिवारले यो घटना सामान्य नभई सुनियोजित र गहिरो षड्यन्त्र भएको आशंका गरेका छन्। उनीहरूले घटनाको सूक्ष्म, निष्पक्ष र पारदर्शी छानबिन गरी दोषी पहिचान गरेर कडा कारबाही गर्न सरकार र सम्बन्धित निकायसँग माग गरेका छन्।
सडक अवरोधका कारण केही समय लोकमार्गमा यातायात अवरुद्ध भएको थियो भने घटनास्थलमा ठूलो संख्यामा सुरक्षाकर्मी परिचालन गरिएको थियो। पीडित परिवारले माग पूरा नभएसम्म आन्दोलन जारी रहने चेतावनी दिएका छन्।
घटनाले समग्र क्षेत्रमा शोक, आक्रोश र भयको वातावरण सिर्जना गरेको छ। स्थानीयवासी तथा मानवअधिकारकर्मीहरूले पनि निष्पक्ष छानबिन र न्याय सुनिश्चित गर्न सम्बन्धित निकायलाई दबाब दिएका छन्।