जीवन बीमा आर्थिक सुरक्षा र स्थायित्वको भरपर्दो आधार :सम्मान तथा रणनीतिक छलफल

महेश सिंह लहान- सन नेपाल लाइफ इन्स्योरेन्स कम्पनी लिमिटेड, लहान शाखामा कम्पनीका वरिष्ठ नायब प्रमुख कार्यकारी अधिकृत श्री कवि फुयालको प्रमुख आतिथ्यमा ADM, ADC तथा इन्स्योरेन्स एडभाइजरहरूलाई सम्मान गर्नुका साथै जीवन बीमाको महत्व र व्यवसायिक रणनीतिसम्बन्धी छलफल कार्यक्रम सम्पन्न भएको छ।
कार्यक्रममा मधेस प्रदेश प्रमुख श्री नवराज चौधरीको गरिमामय समुपस्थितिमा जीवन बीमाले परिवारको आर्थिक सुरक्षा, भविष्यको सुनिश्चितता र जोखिम व्यवस्थापनमा खेल्ने भूमिकामाथि विशेष जोड दिइयो। वक्ताहरूले जीवन बीमालाई केवल बचतको माध्यम मात्र नभई आकस्मिक जोखिमको समयमा परिवारका लागि ढालका रूपमा काम गर्ने दीर्घकालीन आर्थिक सुरक्षा प्रणालीका रूपमा व्याख्या गरे।
वरिष्ठ नायब प्रमुख कार्यकारी अधिकृत कवि फुयालले जीवन बीमाले आम नागरिकमा आर्थिक अनुशासन, दीर्घकालीन सोच र आत्मनिर्भरता विकास गर्ने उल्लेख गर्दै बीमाको पहुँच गाउँ–टोलसम्म विस्तार गर्नु आजको आवश्यकता भएको बताए। उनले विश्वसनीय सेवा, समयमै दाबी भुक्तानी र पारदर्शितामार्फत कम्पनीप्रति जनविश्वास अझ मजबुत बनाइने प्रतिबद्धता व्यक्त गरे।
कार्यक्रममा उत्कृष्ट कार्यसम्पादन गरेका ADM, ADC तथा इन्स्योरेन्स एडभाइजरहरूलाई सम्मान गर्दै उनीहरूको मेहनत र योगदानले जीवन बीमाप्रति जनचेतना बढाउन महत्वपूर्ण भूमिका खेलेको नेतृत्वको भनाइ थियो।
मधेस प्रदेश प्रमुख नवराज चौधरीले जीवन बीमाले विपन्न तथा मध्यम वर्गीय परिवारलाई आर्थिक संकटबाट जोगाउन सहयोग पुर्‍याउने भन्दै बीमासम्बन्धी सचेतना कार्यक्रम अझ व्यापक बनाउनुपर्ने आवश्यकता औंल्याए।
लहान शाखाका प्रबन्धक उपेन्द्र नारायण महतोका अनुसार यस्तो सम्मान तथा रणनीतिक छलफलले कर्मचारी र अभिकर्ताहरूको मनोबल उच्च बनाउनुका साथै जीवन बीमालाई जनजीवनसँग जोड्ने अभियानलाई थप प्रभावकारी बनाउनेछ। कार्यक्रम सौहार्दपूर्ण र उत्साहपूर्ण वातावरणमा सम्पन्न भएको छ।