महेश सिंह लहान – गोलबजार नगरपालिकामा जनता समाजवादी पार्टी (ज.स.पा.) नेपालले पार्टी कार्यालय स्थापना गर्दै संगठन सुदृढीकरणको दिशामा महत्वपूर्ण कदम चालेको छ। पार्टी कार्यालय उद्घाटनपछि गोलबजार क्षेत्रमा ज.स.पा. नेपालको राजनीतिक गतिविधि, जनसम्पर्क र संगठन विस्तार थप प्रभावकारी हुने अपेक्षा गरिएको छ।
उद्घाटन कार्यक्रममा ज.स.पा. नेपालका केन्द्रीय कार्यकारिणी सदस्य तथा सिरहा निर्वाचन क्षेत्र नं. ३ का प्रतिनिधि सभा सदस्यका उम्मेदवार अशेश्वर यादवको उपस्थितिले कार्यक्रमलाई थप अर्थपूर्ण बनाएको थियो। कार्यक्रममा बोल्दै यादवले पार्टी कार्यालयलाई जनताको आवाज बुलन्द गर्ने केन्द्रका रूपमा विकास गरिने बताउनुभयो।
उहाँले मधेसका दीर्घकालीन समस्या, सामाजिक असमानता र जनजीविकासँग सम्बन्धित विषयहरू समाधान गर्न ज.स.पा. नेपाल प्रतिबद्ध रहेको उल्लेख गर्नुभयो। पार्टी कार्यालय स्थापना हुनु केवल भौतिक संरचना मात्र नभई जनताको हक–अधिकारका लागि हुने राजनीतिक संघर्षको आधार केन्द्र भएको उहाँको धारणा थियो।
कार्यक्रममा सहभागी स्थानीय नेता तथा कार्यकर्ताहरूले पार्टी कार्यालय सञ्चालनमा आएपछि जनतासँग प्रत्यक्ष संवाद बढ्ने, स्थानीय मुद्दाहरू उठान हुने र संगठनलाई गाउँ–टोल तहसम्म विस्तार गर्न सहज हुने विश्वास व्यक्त गरे।
उत्साहपूर्ण सहभागिताबीच सम्पन्न उद्घाटन समारोहलाई गोलबजार क्षेत्रमा ज.स.पा. नेपालको राजनीतिक उपस्थितिलाई संस्थागत बनाउने सुरुवातका रूपमा हेरिएको छ।
Discussion about this post