राजविराज–९ मा न्यू होराइजन ईङ्गलिश एकेडेमीले निःशुल्क शिक्षाको नयाँ पहल

महेश सिंह लहान – राजविराज नगरपालिका वडा नम्बर ९, नहर चौकमा अवस्थित न्यू होराइजन ईङ्गलिश एकेडेमीले नर्सरीदेखि कक्षा ८ सम्म निःशुल्क भर्ना अभियान सञ्चालन गर्दै शिक्षा क्षेत्रमा सकारात्मक सन्देश प्रवाह गरेको छ।
अत्याधुनिक प्रयोगशाला सुविधा, व्यवहारिक सिकाइ र बालमैत्री वातावरणसहित सञ्चालनमा आएको यस विद्यालयले छोटो समयमै अभिभावक र विद्यार्थीको विश्वास जित्न सफल भएको छ। नयाँ शैक्षिक भिजनका साथ स्थापना गरिएको विद्यालयले राजविराजको शैक्षिक विकासमा महत्वपूर्ण योगदान पुर्‍याउने अपेक्षा गरिएको छ।
विद्यालयका संस्थापक सेयर सदस्य तथा प्रिन्सिपल देव कुमार पण्डितका अनुसार यहाँ गुणस्तरीय शिक्षा, आधुनिक शिक्षण विधि, प्रयोगात्मक अभ्यासका लागि सुविधा सम्पन्न ल्याब, दक्ष शिक्षक टोली, अनुशासित वातावरण तथा विद्यालय बसको सुविधा उपलब्ध रहेको छ।
बार्षिक उत्सव तथा सरस्वती पूजा कार्यक्रमको अवसरमा आयोजित भर्ना कार्यक्रममा अभिभावकको उल्लेख्य सहभागिता देखिएको थियो। सुविधा सम्पन्न मन्टेश्वरी कक्षा, शान्त वातावरण र आधुनिक शैक्षिक संरचनाले अभिभावक तथा विद्यार्थीलाई आकर्षित गरेको स्थानीयवासी बताउँछन्।
कार्यक्रमका क्रममा विद्यार्थीहरूले विभिन्न सिर्जनात्मक प्रस्तुति दिएका थिए भने तेस्रो त्रैमासिक परीक्षामा उत्कृष्ट नतिजा ल्याउने विद्यार्थीहरूलाई पुरस्कार प्रदान गरिएको थियो, जसले विद्यार्थीहरूमा थप उत्साह र आत्मविश्वास बढाएको देखिन्थ्यो।
कार्यक्रमका प्रमुख अतिथि तथा राजविराज नगरपालिकाका शिक्षा शाखा प्रमुख भोगेन्द्र प्रसाद यादवले निःशुल्क र गुणस्तरीय शिक्षाको अभियानलाई सराहना गर्दै यसले स्थानीय शिक्षा क्षेत्रमा नयाँ सम्भावना खोल्ने विश्वास व्यक्त गर्नुभयो। साथै उहाँले विद्यालय परिवारलाई निरन्तर गुणस्तरमा ध्यान दिन शुभकामना पनि दिनुभयो।
कार्यक्रमको उदघोषण विभा कुमारी यादवले गर्नुभएको थियो। कार्यक्रममा राजविराज–९ का निवर्तमान वडा अध्यक्ष चन्दर यादव, विद्यालयका सेयर सदस्यहरू अजय कुमार पण्डित, भुपेन्द्र प्रसाद यादव, देव नारायण साह तथा मो. सहकद मियाँ लगायतको उपस्थिति रहेको थियो।