लायन्स क्लब अफ लहान सिटी र धनगढीमाईका आगलागी पीडितलाई राहत तथा समवेदना

महेश सिंह लहान,सिरहा- लायन्स क्लब अफ लहान सिटी र लायन्स क्लब अफ धनगढीमाईको संयुक्त आयोजनामा शनिबार आगलागी पीडित परिवारहरूलाई राहत तथा समवेदना प्रदान गरिएको छ।
लहान नगरपालिका–५ बालुवाटोलस्थित समुन्द्री देवी पासमानको घरमा आगलागी हुँदा घर पूर्णरूपमा जलेर नष्ट हुनुका साथै सोही घरमा बसोबास गर्दै आएका उनका ज्वाइँछोराको जलेर निधन भएको घटनाप्रति गहिरो दुःख व्यक्त गर्दै क्लबले पीडित परिवारलाई राहत सामग्रीसहित भावनात्मक समवेदना प्रकट गरेको हो।

त्यसैगरी धनगढीमाई नगरपालिकास्थित एक दलित परिवारको करिब १० कट्ठा खेतमा लगाइएको धान आगलागीका कारण जलेर नष्ट भएपछि उक्त परिवारलाई पनि आवश्यक राहत सामग्री हस्तान्तरण गरिएको छ।
लायन्स क्लब अफ लहान सिटीका प्रतिनिधि ललित नारायण महतोका अनुसार कठ्याङ्ग्रिँदो चिसो मौसमका बाबजुद क्लबका सदस्यहरू जनसेवाका कार्यमा सक्रिय रहँदै आएका छन्। आगलागी पीडितलाई राहत वितरणसँगै क्लब अन्य सामाजिक सेवाका गतिविधिहरूमा समेत निरन्तर संलग्न रहेको उनले जानकारी दिए।

राहत वितरण कार्यक्रममा वरिष्ठ समाजसेवीहरूको उल्लेखनीय उपस्थिति रहेको बताइएको छ। सहभागीहरूले यस्ता मानवीय सेवाले समाजमा सहकार्य, करुणा र उत्तरदायित्वको भावना मजबुत बनाउने विश्वास व्यक्त गरेका थिए।