महेश सिंह लहान सिरहा – लैङ्गिक हिंसा विरुद्धको १६ दिने अभियान चलिरहेको बीच धनुषामा एक हप्ताभित्रै दुई महिलाको शंकास्पद मृत्युको घटनाले स्थानीय अवस्था थप संवेदनशील बनेको छ। यिनै घटनालाई लिएर महिला मानव अधिकार रक्षकहरूले खबरदारी र्याली निकाल्दै सत्यतथ्य स्पष्ट पार्न प्रदेश प्रहरीको ध्यानाकर्षण गराएका छन्।
र्यालीमा सहभागी महिलाहरूले ब्यानर, प्लेकार्ड सहित दोषीलाई कारबाही, निष्पक्ष छानबिन र पीडित परिवारलाई न्याय सुनिश्चित गर्न माग गरेका थिए। उनीहरूले महिला माथिको हिंसा रोक्न राज्य संयन्त्र सक्रिय बन्नुपर्नेमा जोड दिए।
कार्यक्रमका आयोजनाकर्ता महिला मानव अधिकार रक्षक समूहले प्रदेश प्रहरी कार्यालयमा ध्यानाकर्षण पत्र बुझाउँदै दुवै घटनाको छिटो, निष्पक्ष र पारदर्शी अनुसन्धान गर्न आग्रह गरेको छ। ध्यानाकर्षण पत्रमार्फत पीडित परिवारलाई मनो–सामाजिक सहयोग र न्यायिक प्रक्रिया सहज बनाउन सरकारी संयन्त्र सक्रिय हुनुपर्ने माग पनि राखिएको छ।
अधिकारकर्मीहरूको भनाइमा, १६ दिने अभियानकै अवधिमा महिलाको शंकास्पद मृत्यु हुनु प्रदेशमा बढ्दो लैङ्गिक हिंसाको गम्भीर संकेत हो। उनीहरूले जनताको सुरक्षा सुनिश्चित गर्ने, हिंसा रोकथामका कार्यक्रम प्रभावकारी बनाउने र जोखिममा रहेका महिलाहरूको संरक्षणमा तत्काल कदम चाल्न प्रदेश सरकार तथा सुरक्षातन्त्रलाई आग्रह गरेका छन्। र्यालीमा स्थानीय महिलाहरू, अधिकारकर्मी, समुदाय प्रतिनिधि र विभिन्न सामाजिक संघ–संस्थाका प्रतिनिधिहरू सहभागी थिए।
Discussion about this post