लहानमा सचेतनासहित विश्व एड्स दिवस मनाइयो, समुदायलाई परीक्षण र सुरक्षा सन्देश

महेश सिंह लहान सिरहा-३८औँ विश्व एड्स दिवस सिरहामा विभिन्न कार्यक्रमसहित मनाइएको छ। जिल्ला स्वास्थ्य कार्यालय सिरहा र प्रादेशिक अस्पताल लहानको संयोजनमा आयोजित कार्यक्रममा एड्ससम्बन्धी सचेतना, रोकथाम र उपचार पहुँचबारे विस्तृत जानकारी साझा गरियो।

कार्यक्रम जिवन रेखा सेवा समाज लहान, जिवन ज्योति समाज लहान लगायतका सरोकारवालाहरूको सहकार्यमा सम्पन्न गरिएको लहान एआरटीका इन्चार्ज हरेराम महतोले जानकारी दिए। सहभागी संस्थाहरूले “अवरोधहरू पार गरौँ, एड्स प्रतिकार्य रूपान्तरण गरौँ” भन्ने मूल नारासहित जनचेतनामूलक गतिविधि सञ्चालन गरेका थिए।

सो अवसरमा प्रादेशिक अस्पताल लहानका मे.सु रन्जित झा, जिवन ज्योति समाजका इन्चार्ज लक्ष्मेश्वर यादव, जिवन रेखा समाज मधेस प्रदेशका इन्चार्ज रेखा महतोलगायतले एचआईभी/एड्सबारे गलत धारणाहरू हटाउँदै नियमित परीक्षण, सुरक्षित व्यवहार र रोगसँग जीवनयापन सम्भव हुने सन्देश प्रवाह गरेका थिए।
सहभागीले समुदायस्तरमै सचेतना अभिवृद्धि, उपचार पहुँच विस्तार र भेदभाव अन्त्य गर्दै एड्सविरुद्धको प्रतिकार्यलाई प्रभावकारी बनाउने प्रतिबद्धता व्यक्त गरेका छन्।