राजविराजमा ट्राफिक अव्यवस्था समाधानमा एसपी केसी आफैँ सडकमा, प्रहरीप्रतिको भरोसा बढ्यो

महेश सिंह सिरहा लहान – राजविराजमा बढ्दो ट्राफिक अव्यवस्थाले स्थानीयवासीलाई परिरहेको कठिनाइ प्रत्यक्ष हेर्न जिल्ला प्रहरी प्रमुख प्रहरी उपरीक्षक (एसपी) गौतम कुमार केसी आज स्वयं सडकमै उत्रिएका छन्। युवाहरूको आग्रहपछि गरिएको यो सक्रिय हस्तक्षेपलाई समुदायले अत्यन्त सकारात्मक रूपमा लिएको छ।

एसपी केसीले व्यस्त चोक तथा संवेदनशील स्थानहरूमा पहुँच गर्दै सडक अवरोध, पार्किङ अव्यवस्था, लेन–अनुशासन र भीड व्यवस्थापन सम्बोधन गर्न प्रहरी टोलीसहित तत्काल सुधारात्मक कदम चालेका थिए।

“जनताको समस्या प्रत्यक्ष महसुस गर्दै नेतृत्व आफैँ अग्रपंक्तिमा उत्रिनु प्रहरीप्रतिको भरोसा अझ गहिरो बनाउने काम हो,” सप्तरी युथ नेपालले प्रतिक्रिया दिंदै जनाएको छ। जिल्ला प्रहरी कार्यालय सप्तरीका अनुसार, ट्राफिक व्यवस्थापनलाई दिगो, सुरक्षामूलक र नागरिकमैत्री बनाउने उद्देश्यले दैनिक निगरानी, थप जनशक्ति परिचालन र स्थानीय सरकारसँगको समन्वयलाई प्राथमिकतामा राखिएको छ।

स्थानीय तहलाई पनि ट्राफिक सुधारमा हातेमालो गर्न “उदाहरणीय पहल”का रूपमा एसपी केसीको कदम प्रशंसनीय रहेको बताइएको छ। राजविराजमा ट्राफिक अव्यवस्था दीर्घकालीन समस्या बनेको पृष्ठभूमिमा प्रहरी नेतृत्वको यो सक्रियता सडक सुरक्षा र शहरी व्यवस्थापनमा महत्वपूर्ण मोडका रूपमा हेाइएको छ।