पद्मोदय फाउन्डेसनद्वारा शिक्षा, स्वास्थ्य र खेलकुद सुदृढीकरणमा जोड

महेश सिंह लहान सिरहा –समुदाय र विद्यालयबीचको सहकार्यलाई बलियो बनाउँदै पद्मोदय फाउन्डेसनले सुखीपुर नगरपालिका–२, छजनास्थित श्री राम जानकी प्राविधिक विद्यालयमा एकैदिन तीन महत्वपूर्ण सामाजिक कार्यक्रम सम्पन्न गरेको छ।

कार्यक्रम अन्तर्गत विद्यालय परिसरमा वृक्षारोपण, खेलकुद सामग्री हस्तान्तरण र लागुऔषध दुव्र्यसन न्यूनीकरणसम्बन्धी सचेतना अन्तर्क्रिया गरिएका छन्। यसले विद्यार्थीहरूमा हरियालीप्रतिको माया, खेलकुदप्रतिको आकर्षण र स्वच्छ जीवनशैलीबारे सचेतना जगाएको विद्यालयले जनाएको छ।

फाउन्डेसनका कार्यक्रम संचालक राजकुमार महतोको संयोजनमा सम्पन्न कार्यक्रममा संरक्षक अशोक खड्का, जिल्ला अध्यक्ष दिपेन्द्र महतो, इन्स्पेक्टर विशाल मल्ल (इलाका प्रहरी कार्यालय लक्ष्मीपुर पतारी), विद्यालयका प्रधानाध्यापक राम प्रताप यादव तथा व्यवस्थापन समितिका अध्यक्ष रामसुभे यादवलगायत सरोकारवालाको उपस्थिति रहेको थियो।

सो अवसरमा फाउन्डेसनले विद्यालयलाई रु. १,२५,०००/- (एक लाख पच्चीस हजार रुपैयाँ) नगद सहयोगसहित क्रिकेट नेट बक्स र अन्य खेलकुद सामग्री हस्तान्तरण गरेको थियो।

फाउन्डेसनका पदाधिकारीहरूले कार्यक्रमको उद्देश्य विद्यालयलाई हरियाली, स्वास्थ्य र खेलकुदमैत्री वातावरण बनाउँदै विद्यार्थीहरूमा सकारात्मक सोच, अनुशासन र आत्मविकासको भावना अभिवृद्धि गर्नु रहेको बताएका छन्।

स्थानिय अभिभावक र विद्यालय समुदायले पद्मोदय फाउन्डेसनको यो पहललाई विद्यालय विकासमा सामुदायिक सहकार्यको प्रेरणादायी उदाहरणका रूपमा स्वागत गरेका छन्।