महेश सिंह लहान सिरहा- मिटरब्याजको जाली तमसुक रद्द तथा लघुवित्त कम्पनीहरूले लगाइरहेको अन्यायपूर्ण ऋण र ब्याज मिनाहा गराउन माग गर्दै सिरहाको गोलबजारमा संयुक्त जनअधिकार आन्दोलन नेपालले संयुक्त भेला तथा प्रशिक्षण कार्यक्रम सम्पन्न गरेको छ।
कार्यक्रमलाई सम्बोधन गर्दै संगठनका केन्द्रीय अध्यक्ष मणिराम ज्ञवालीले आर्थिक शोषणभन्दा मुक्त ‘ऋणमुक्त समाज’ निर्माण गर्ने लक्ष्यसहित आन्दोलनलाई देशव्यापी रूपमा सशक्त बनाइने बताए। उनले भने, “एक मुठी सास रहेका बेला पीडितलाई न्याय नदिइ हामी घर फर्किँदैनौँ। न्याय बिना थाकिँदैनौँ, झुकिँदैनौँ।”
ज्ञवालीले आफू र अभियानी अभधेश कुशवाहाले पीडितको मुद्दा समाधान नभएसम्म आन्दोलनमै रहने प्रतिबद्धता व्यक्त गरे। उनका अनुसार देशभर लघुवित्त, मिटरब्याज, जाली तमसुक र अवैध ऋण असुलीका कारण हजारौँ परिवार पीडामा रहेकाले अब ‘निर्णायक संघर्ष’ आवश्यक छ।
कार्यक्रममा केन्द्रिय अभियानी मनोज पौडेल, दिलिप गंन्जामगर, धनिकलाल चौधरी, सिलम यादव, युबराज रसाइली, मनोज पासवान, अर्जुन विश्वकर्मा तथा सप्तरी जिल्ला अध्यक्ष सञ्जीव चौधरीले क्रमशः मन्तव्य राख्दै आर्थिक शोषणका विरुद्ध ऐक्यबद्ध लडाइँमा साथ दिन सर्वसाधारणलाई आह्वान गरे।
सहभागीमध्ये मधेस प्रदेशका उल्लेखनीय मिटरब्याज र लघुवित्त पीडितहरूको उपस्थिति विशेष रह्यो, आयोजक समितिका पुनम महतो र उषा चौधरीले जानकारी दिए। उनीहरूको भनाइमा मिटरब्याज तथा लघुवित्त पीडितहरूको वास्तविक अवस्था, कानुनी प्रक्रिया, न्याय प्राप्तिका उपाय तथा संगठनात्मक सुदृढीकरणबारे विस्तृत प्रशिक्षण दिइएको थियो।
कार्यक्रममा उपस्थित पीडितले जाली तमसुक खारेज, ऋण पुनर्संरचना, अवैध ब्याजदर रोकथाम तथा ऋणीहरूको सुरक्षाको माग गर्दै सरकारलाई चाँडो हस्तक्षेप गर्न आग्रह गरे। संयुक्त जनअधिकार आन्दोलन नेपालले प्रदेशदेखि केन्द्रसम्म दबाबमूलक अभियान अघि बढाउने घोषणा गर्दै कार्यक्रम समापन गरेको छ।
Discussion about this post