महेश सिंह सिरहा- प्राविधिक शिक्षा तथा व्यावसायिक तालिम परिषद् (CTEVT) अन्तर्गतको आंगिक संस्था लहान प्राविधिक शिक्षालय, लहान सिरहाको प्रमुखमा राजकुमार चौधरी नियुक्त भएका छन्। उनले शिक्षालयका २२औं प्रमुखका रूपमा हालै जिम्मेवारी सम्हालेका हुन्।
सिरहाको लहान ग्रामिण क्षेत्रमा अवस्थित उक्त शिक्षालयमा हाजिरी जनाउँदै चौधरीले प्राविधिक शिक्षालाई अझ सुदृढ र समयानुकूल बनाउने प्रतिबद्धता जनाएका छन्। “शिक्षार्थीलाई सीपमूलक र व्यवहारिक शिक्षा प्रदान गर्दै रोजगारीमुखी दक्ष जनशक्ति उत्पादन नै हाम्रो प्राथमिक लक्ष्य हुनेछ,” चौधरीले बताए।
उनले शिक्षालयमा शिक्षण–सिकाइको गुणस्तर सुधार, प्राविधिक पूर्वाधार सुदृढीकरण र स्थानीय उद्योगसँग सहकार्य गरी विद्यार्थीलाई रोजगारमुखी बनाउने योजना अघि सारेका छन्।
शिक्षालय परिवारले नयाँ प्रमुख चौधरीको स्वागत गर्दै उनको नेतृत्वमा संस्थाले नयाँ उपलब्धि हासिल गर्ने विश्वास व्यक्त गरेको छ।
Discussion about this post