सामुदायको सहभागितामा हात्तिदह लहान–१५ मा वातावरण संरक्षणको प्रेरक अभियान

यस अभियानको विशेषता भनेकै विभिन्न तहका सरोकारवालाहरू—विद्यार्थी, सञ्चारकर्मी, कृषक समूह, सामुदायिक वनका प्रतिनिधि, तथा स्थानिय अगुवाहरूको संयुक्त उपस्थिति र सक्रियता हो। कोइरालो खोला नमूना सामुदायिक वन उपभोक्ता समिति, राष्ट्रिय कृषक समूह महासंघ नेपाल, संरक्षण परियोजना र डिभिजन वन कार्यालय लहानको सहकार्यले कार्यक्रमलाई जनस्तरमै प्रभावशाली बनाएको थियो।

कार्यक्रममा फलफूल र औषधिजन्य बिरुवाहरू रोपिँदा उपस्थित समुदायमा संरक्षणप्रतिको भावना बलियो देखिएको थियो। स्थानीय बासिन्दाहरूले पर्यावरणीय सन्तुलनका लागि सानो योगदान पनि दीर्घकालीन असर पार्न सक्ने धारणा राखे।

वडा अध्यक्ष तेज नारायण चौधरीले यस्तो किसिमको अभियानले सामाजिक एकता र दायित्वबोधमा समेत टेवा पुग्ने बताए। उनले भने, “वातावरणको संरक्षण केवल सरकारी निकायको जिम्मा होइन, यो हाम्रै जीवनसँग गाँसिएको विषय हो।”

विद्यार्थीहरूद्वारा प्रस्तुत कविता, चित्रकला र नाटकहरूले कार्यक्रमलाई सिर्जनात्मक आयाम दिएको थियो भने, सञ्चारकर्मी र स्थानीय अगुवाहरूको सक्रिय उपस्थितिले यसलाई जनसरोकारको कार्यक्रम बनाएको थियो।

कार्यक्रमका अध्यक्ष मनोज कुमार कर्णले समुदाय र संस्थाहरूबीचको समन्वयलाई वातावरण संरक्षणको मेरुदण्ड भने। “समुदायले नेतृत्व लिएर यस्तो काम गर्दा त्यो दीर्घकालीन रूपमा प्रभावकारी हुन्छ,” उनले जोड दिए।

कार्यक्रमको अन्त्यमा आयोजकहरूले धन्यवाद ज्ञापन गर्दै आगामी दिनमा थप क्षेत्रहरूमा वृक्षारोपण र सचेतनामूलक अभियान विस्तार गर्ने प्रतिवद्धता जनाए।

लहान–१५ को हात्तिदह क्षेत्र यस दिन हरियाली अभियानको केन्द्र बनेको मात्र होइन, समुदायले कसरी वातावरणीय संरक्षणमा अग्रसर भूमिका खेल्न सक्छ भन्ने उदाहरणसमेत बनेको छ।