धनगढीमाईमा जनमत पार्टीको विशाल आमसभा सम्पन्न, हजारौंको पार्टी प्रवेश

महेश सिंह सिरहा – सिरहा जिल्लाको धनगढीमाई नगरपालिका बसनपुरमा जनमत पार्टीको भव्य आमसभा तथा पार्टी प्रवेश कार्यक्रम भव्यताका साथ सम्पन्न भएको छ। कार्यक्रममा प्रदीप महतोको नेतृत्वमा विभिन्न पार्टी परित्याग गरी हजारौं नेता तथा कार्यकर्ताले जनमत पार्टीमा प्रवेश गरेका छन्।
कार्यक्रम जिल्ला अध्यक्ष विनोद यादवको अध्यक्षतामा सुरु भएको थियो भने पार्टीका केन्द्रीय अध्यक्ष डा. सिके राउत प्रमुख अतिथिको रूपमा उपस्थित हुनु भएको थियो। कार्यक्रममा मधेस प्रदेशका मुख्यमन्त्री तथा जनमत पार्टीका वरिष्ठ नेता सतिस कुमार सिंहले पार्टी स्थापना भएको पाँच वर्षमै मधेस प्रदेशमा सरकार गठन गरी जनमत पार्टीले महत्वपूर्ण सफलता हासिल गरेको उल्लेख गर्नुभयो। उहाँले आउने दिनमा जनमत पार्टी मधेसमा सबैभन्दा बलियो शक्ति बन्ने दाबी समेत गर्नुभयो।
आमसभामा वन तथा वातावरण मन्त्री त्रिभुवन साह, पूर्व मन्त्रीहरू महेश यादव र संजय यादव, साथै नेता बालेश्वर यादव, सुभाष चौधरी, रमेन मण्डल, खुशबु जेसवाल, दिलीप दास, इन्द्र देव महतो, सन्तोष महतो लगायत सयौं शीर्ष नेताहरूको उपस्थिति रहेको थियो।
पार्टी प्रवेश कार्यक्रमको नेतृत्व गरेका स्थानीय नेता प्रदीप महतोले जनमत पार्टीमा प्रवेश गर्नेहरूको ओइरो लागेको जनाउँदै, जहाँ जनमत पार्टीको सरकार छ त्यहाँ जनताको पक्षमा उत्कृष्ट काम भइरहेको दाबी गर्नुभयो। कार्यक्रममा हजारौं नेता तथा कार्यकर्ताहरूको सहभागिता रहेको आयोजक समितिले जनाएको छ।