जसपा नेपालको लहान नगर अध्यक्षमा महतो निर्वाचित

महेश सिंह लहान- जनता समाजवादी पार्टी (जसपा) लहान नगर कमिटीको नेतृत्व फेरिएसँगै स्थानीय राजनीति नयाँ तरंगमा प्रवेश गरेको छ। अध्यक्षमा राम उदगार महतो निर्वाचित भएका छन्, तर उनको उम्मेदवारीले ‘एक पद, एक व्यक्ति’ सिद्धान्तलाई लिएर उत्पन्न विवाद अझै सेलाएको छैन।
महतोले ७० मत ल्याउँदै निकटतम प्रतिस्पर्धी योगेन्द्र यादवलाई ९ मतले हराए पनि चुनावको समग्र प्रक्रियाले जसपाभित्रको नेतृत्व चयनको शैलीप्रति असन्तुष्टि झल्काएको छ। यादवले ६१ मत प्राप्त गरेका थिए। कुल १३५ प्रतिनिधिमध्ये १३१ जनाले मतदान गरे।
नेतृत्व चयनमा सहमति हुन नसकेपछि अध्यक्ष, उपाध्यक्ष, सचिव, सहसचिव र कोषाध्यक्ष पदका लागि चुनावमार्फत नयाँ कार्यसमिति चयन गरिएको हो। उपाध्यक्षमा शत्रुधन यादव र चन्द्र नारायण कुशवाहा, सचिवमा राम औतार महतो, सहसचिवमा शिव कुमार महतो र राम किसुन यादव तथा कोषाध्यक्षमा राधा महतो निर्वाचित भए।
राम उदगार महतो हाल क्षेत्रीय उपाध्यक्ष र वडा अध्यक्षसमेत रहेकाले अध्यक्ष पदमा उनको उम्मेदवारीले पार्टीभित्र गहिरो बहस जन्माएको थियो। योगेन्द्र यादव पक्षले ‘एक पद, एक व्यक्ति’को माग उठाउँदै सहमति खोजे पनि अन्ततः प्रतिष्पर्धा अनिवार्य भयो।
पार्टीका एक नेताका अनुसार, “हरिशरण यादवले एक मात्र मत ल्याउँदा, सुभकलाल यादवले आफ्नो मत पनि राम उदगार महतोलाई दिँदै स्पष्ट समर्थन जनाए। यसले राम उदगार महतोको जितमा निर्णायक भूमिका खेलेको हो।”
पूर्व नगर अध्यक्ष दीनेश महतो र अन्य नेताहरूले विगतमा जसपाको स्थानीय नेतृत्वमा पारदर्शिता अभाव, निर्णय प्रक्रियामा सहभागिता नहुनु र कार्यशैलीमा मनपरी भएको गुनासो गर्दै आएका थिए। नेताहरूले नेतृत्व परिवर्तनसँगै पार्टीमा सुधार र संस्थागत सुदृढीकरणको आशा व्यक्त गरेका छन्।
यद्यपि, चुनावको प्रतिस्पर्धाले आन्तरिक एकतामा असर पारेको ठान्ने केही नेताहरूले सहमतिमा नेतृत्व चयन भएको भए राम्रो हुने धारणा व्यक्त गरेका छन्।
अब निर्वाचित टिमले विगतका कमजोरी सुधार गर्दै पार्टीलाई पारदर्शी, सहभागी र समावेशी बनाउने दिशामा अघि बढ्ने अपेक्षा गरिएको छ।