सखुवानान्कारकट्टीमा जसपा नेपालको अधिबेशन सम्पन्न नयाँ वडा कार्य समिति चयन

महेश सिंह लहान-सिरहा जिल्लाको सखुवानान्कारकट्टी गाउँपालिकाका विभिन्न वडामा सम्पन्न अधिवेशनबाट नयाँ वडा कार्य समिति चयन गरिएको छ। निर्वाचन प्रकृया सम्पन्न भएसँगै स्थानीय नेतृत्व चयन भएको हो, जसले विकास, सुशासन र सामाजिक उत्थानलाई प्राथमिकता दिने प्रतिबद्धता जनाएको छ।
गाउँपालिकाका वडा नम्बर १, २, ३, र ५ मा अधिवेशन भई वडा अध्यक्ष तथा अन्य पदाधिकारीहरू चयन भएका छन्। वडा नम्बर १ मा आमुन प्रसाद यादव, वडा नम्बर २ मा हुकुम देव यादव, वडा नम्बर ३ मा देवेन्द्र प्रसाद यादव, र वडा नम्बर ५ मा किसोर यादव वडा अध्यक्षमा निर्वाचित भएका छन्।
अधिवेशनमार्फत विभिन्न प्रतिनिधिहरू पनि चयन भएका छन्। वडा नम्बर १ बाट २ जना जिल्ला प्रतिनिधि र ८ जना पालिका प्रतिनिधि चयन भएका छन् भने वडा नम्बर २ बाट २ जना जिल्ला प्रतिनिधि तथा ७ जना पालिका प्रतिनिधि चयन भएका छन्। त्यसैगरी, वडा नम्बर ३ बाट १ जना जिल्ला प्रतिनिधि र ३ जना पालिका प्रतिनिधि चयन भएका छन् भने वडा नम्बर ५ बाट १ जना जिल्ला प्रतिनिधि र ३ जना पालिका प्रतिनिधि चयन भएका छन्।
निर्वाचन समितिका संयोजक हरेराम यादवका अनुसार निर्वाचन प्रक्रिया निष्पक्ष र व्यवस्थित रूपमा सम्पन्न भएको हो। निर्वाचन समितिमा प्रदीप कुमार यादव, मोहन साह, मिथिलेश कुमार यादव लगायतको टोलीले समन्वय गरेको थियो।
गाउँपालिकाका पाँच वडामध्ये चार वडामा अधिवेशन सम्पन्न भइसकेको छ भने वडा नम्बर ४ को अधिवेशन आज सम्पन्न गरिने प्रदेश कमिटी सदस्य दिपेश कुमार यादवले जानकारी दिए।
नवनिर्वाचित कार्य समितिले शिक्षा, स्वास्थ्य, पूर्वाधार, रोजगारी प्रवर्द्धन, पारदर्शी प्रशासन तथा सामाजिक समरसता जस्ता विषयलाई प्राथमिकतामा राख्दै काम गर्ने प्रतिबद्धता जनाएको छ। स्थानीय युवा नेता दिपेश यादवका अनुसार नवगठित समितिले प्रभावकारी नीति तथा योजनाहरू बनाएर जनअपेक्षा पूरा गर्ने प्रयास गर्नेछ।
कार्यक्रममा समाजसेवी, राजनीतिक दलका प्रतिनिधिहरू, नागरिक अगुवा तथा स्थानीय बासिन्दाहरूको उल्लेखनीय उपस्थिति रहेको थियो। उपस्थित सबैले नवगठित समितिलाई बधाई दिँदै सफल कार्यकालको शुभकामना व्यक्त गरे।
स्थानीय समुदायले पारदर्शी प्रशासन, जवाफदेहितायुक्त सेवा प्रवाह, विकास निर्माणमा तीव्रता तथा सामाजिक न्यायको सुनिश्चितता नयाँ समितिबाट अपेक्षा गरेका छन्। यस अधिवेशनलाई स्थानीय नेतृत्व विकास र सुशासन प्रवर्द्धनतर्फको महत्वपूर्ण पहलका रूपमा हेरिएको छ।