महेश सिंह लहान – मधेस प्रदेशका आठ जिल्लामा हरवा चरवा पुनःस्थापनाका विषयमा जिल्ला स्तरका बैठकहरू भइरहेका छन्। राष्ट्रिय दलित नेटवर्क (RDN) नेपालद्वारा सञ्चालित हरवा चरवा संगठन सशक्तीकरण कार्यक्रमअन्तर्गत जिल्ला हरवा चरवा अधिकार मञ्चका पूर्ण बैठकहरू क्रमशः बस्दै छन्। सिरहा, धनुषा र सप्तरीका बैठक सकिएको छ भने अन्य जिल्लामा छलफल जारी छ।
बैठकहरूमा हरवा चरवा समुदायको पहिचान गरी परिचयपत्र वितरण गर्नुपर्ने, पुनःस्थापनासम्बन्धी कार्यविधि पारित गर्नुपर्ने, जीविकोपार्जनका कार्यक्रमहरू लागू गर्नुपर्ने विषयमा निर्णयहरू भएका छन्। बैठकले यी मागहरू पूरा गर्न मधेस प्रदेश सरकारलाई दबाब दिने निष्कर्ष निकालेको छ।
“हरवा चरवा समुदायको जीवनस्तर उकास्न राज्यको विशेष ध्यान जानु जरुरी छ,” एक सहभागीले भने, “परिचयपत्र वितरण, पुनःस्थापना, रोजगारीका अवसर सिर्जना गर्नेतर्फ सरकार गम्भीर हुनुपर्छ।”
मधेस प्रदेशमा अझै ठूलो संख्यामा हरवा चरवा समुदाय भूमिहीन रूपमा श्रम गर्न बाध्य छन्। उनीहरूको पुनःस्थापनाका लागि विशेष नीति निर्माण र कार्यान्वयन हुनुपर्नेमा सरोकारवालाहरूको जोड छ।
Discussion about this post