महेश सिंह लहान, सिरहा- स्नेह वृद्धाआश्रम, लहान सिरहाको छैटौँ साधारणसभा शनिबार सम्पन्न भएको छ। साधारणसभामा आश्रमको हालसम्मको गतिविधि, आगामी कार्ययोजना तथा वृद्धवृद्धाको अवस्था बारे समीक्षा गरिएको थियो।
कार्यक्रममा बोल्दै महिला अधिकारकर्मी रिता महतोले सिरहा जिल्लाका अधिकांश स्थानीय तहमा राहत वितरण प्रक्रिया राजनीतिक प्रभावबाट प्रभावित भएको गम्भीर आरोप लगाउनुभयो। उहाँले वास्तविक पीडित, असहाय तथा जरुरतमन्द व्यक्तिहरूले राहत नपाउने अवस्था सिर्जना भएको बताउनुभयो।
“राहत वितरण मानवीय संवेदनासँग जोडिएको विषय हो, तर दुःखको कुरा राजनीति हाबी हुँदा वास्तविक पीडितहरू ओझेलमा परेका छन्,” उहाँले भन्नुभयो। स्थानीय तहले निष्पक्ष, पारदर्शी र आवश्यकतामा आधारित राहत प्रणाली लागू गर्नुपर्नेमा उहाँले जोड दिनुभयो।
साधारणसभामा सहभागी वक्ताहरूले वृद्धवृद्धाको हेरचाह, संरक्षण र सम्मान सुनिश्चित गर्न राज्य तथा स्थानीय तहको भूमिका अझ प्रभावकारी हुनुपर्ने आवश्यकता औँल्याएका थिए। साथै स्नेह वृद्धाआश्रमले सीमित स्रोतसाधनका बाबजुद निरन्तर रूपमा असहाय वृद्धवृद्धाको सेवामा योगदान दिइरहेको भन्दै आश्रमको प्रशंसा गरिएको थियो।
साधारणसभाले आगामी दिनमा आश्रमको सेवा विस्तार, सहयोग संकलन तथा सामाजिक सचेतना अभिवृद्धि गर्ने निर्णयसमेत गरेको छ।
Discussion about this post