इलामबाट फर्किंदै गरेको विद्यार्थी सवार बस दुर्घटनाग्रस्त, दुई विद्यार्थी गम्भीर घाइते

महेश सिंह लहान – सिरहा जिल्लाको धनगढीमाई नगरपालिका–८ मा अवस्थित सरस्वती मोडल स्कुलका विद्यार्थी सवार बस इलामबाट फर्किने क्रममा दुर्घटनामा परेको छ।
कक्षा १० का विद्यार्थीहरू लिएर शैक्षिक भ्रमणका लागि इलाम पुगेको उक्त बस फर्किने क्रममा इलामको रोङ गाउँपालिका कार्यालय अगाडि दुर्घटना भएको हो। दुर्घटनाका बेला बसमा करिब ३५ जना विद्यार्थी तथा शिक्षक सवार रहेको बताइएको छ।
प्राप्त प्रारम्भिक जानकारीअनुसार दुर्घटनामा दुई जना विद्यार्थी सामान्यभन्दा गम्भीर रूपमा घाइते भएका छन् भने अन्य विद्यार्थीहरूलाई सामान्य चोटपटक लागेको छ। घाइते सबैलाई तत्काल उद्धार गरी उपचारका लागि झापाको बिर्तामोडस्थित अस्पताल पठाइएको छ।
दुर्घटनाको कारणबारे विस्तृत विवरण आउन बाँकी रहेको छ भने घटनास्थलमा स्थानीयबासी तथा सुरक्षाकर्मीको सहयोगमा उद्धार कार्य सम्पन्न गरिएको जनाइएको छ। विद्यार्थीहरूको अवस्थाबारे थप जानकारी आउन बाँकी छ।