महेश सिंह सिरहा लहान – मधेस प्रदेशमा आयोजना हुन लागेको नेपाली कम्युनिष्ट पार्टीको एकता सन्देश सभा तयारीका लागि हिजो ढल्केवरमा बसेको बैठक उत्साहजनक वातावरणमा सम्पन्न भएको छ। विभिन्न दल–घटकबाट आएका नेता तथा कार्यकर्ताहरूको उल्लेखनीय उपस्थिति रहेको बैठकले एकताप्रति सकारात्मक ऊर्जा प्रवाह गरेको बताइएको छ।
बैठक तत्कालीन नेपाल समाजवादी पार्टीका अध्यक्ष तथा नेपाली कम्युनिष्ट पार्टीका केन्द्रीय सदस्य महिन्द्र राय यादवको अध्यक्षतामा सम्पन्न भयो। कार्यक्रमको **सञ्चालन तत्कालीन नेकपा माओवादी केन्द्र सिरहा इञ्चार्ज अजय शंकर नायक ‘अविनाश’**ले गरेका थिए।
त्यसैगरी तत्कालीन नेकपा एकीकृत समाजवादी पार्टीका नेता सुधीर साहले स्वागत मन्तव्य दिएका थिए भने बैठकमा तत्कालीन नेकपा माओवादी केन्द्रका उपमहासचिव तथा नेपाली कम्युनिष्ट पार्टीका केन्द्रीय सदस्य मातृका यादव र तत्कालीन नेकपा एकीकृत समाजवादी पार्टीका उपाध्यक्ष तथा नेपाली कम्युनिष्ट पार्टीका केन्द्रीय सदस्य धर्मनाथ साहले समेत आफ्नो धारणा प्रस्तुत गरेका थिए।
बैठकमा विभिन्न वाम–घटक, दल र संगठनबाट आबद्ध नेता तथा प्रतिनिधिहरूको सक्रिय सहभागिता रहेको थियो। सहभागीहरूले एकताले मधेस प्रदेशमा प्रगतिशील राजनीतिक धारा थप सुदृढ बनाउने विश्वास व्यक्त गरेका थिए।
बैठकमा आफ्नो दृष्टिकोण साझा गर्दै एक सहभागीले भने,
“एकता सन्देश सभालाई भव्य, सभ्य र फरक शैलीमा प्रस्तुत गर्दै नयाँ परिस्थितिमा नयाँ सोच र मोडलसहित रूपान्तरण गर्दै अघि बढ्नु आजको आवश्यकता हो।”
बैठकले प्रदेशभर एकता अभियन्ताहरूलाई संगठित गर्ने, कार्यक्रमलाई प्रभावकारी बनाउने तथा नयाँ राजनीतिक परिवेशअनुसार सन्देश सभाको मोडालिटी तय गर्ने कार्यलाई प्राथमिकतामा राखेको जनाएको छ।
Discussion about this post