महेश सिंह सिरहा- लहान नगरपालिकामा ३८औँ लैङ्गिक हिंसा बिरुद्धको १६ दिने अभियान अन्तर्गत शनिबार जनचेतनामूलक र्याली तथा अन्तरक्रिया कार्यक्रम सम्पन्न भएको छ। ‘प्रविधिको सही प्रयोग गरौँ, लैङ्गिक हिंसा अन्त्य गरौँ’ भन्ने नारा सहित आयोजित र्यालीमा स्थानीय महिला समूह, सामाजिक संस्था, सुरक्षा निकायका प्रतिनिधि र नगरका अधिकारीहरूको सक्रिय सहभागिता देखियो।
र्यालीले डिजिटल माध्यमबाट महिलामाथि बढ्दै गएको हिंसालाई रोकथाम गर्ने, समाजमा सुरक्षित डिजिटल प्रयोगबारे व्यापक सचेतना फैलाउने उद्देश्य बोकेको थियो। सहभागीहरूले हातमा प्लेकार्ड लिएर डिजिटल हिंसा, घरायसी हिंसा तथा सामाजिक विभेद अन्त्यका सन्देशहरु सार्वजनिक रूपले प्रकट गरे।
कार्यक्रम लहान नगरपालिकाको आयोजनामा सञ्चालन गरिएको हो। नगर प्रमुख, सुरक्षा अधिकारी तथा सामाजिक संघ–संस्थाका प्रतिनिधिहरूले अन्तरक्रियामा लैङ्गिक हिंसा रोकथामका चुनौती, प्रविधिको सुरक्षित प्रयोग र समुदाय–स्तरबाटै निरन्तर सचेतना आवश्यकताबारे विचार राखेका थिए। र्यालीमा सहभागी महिला समूह र नागरिक समाजका प्रतिनिधिहरूले १६ दिने अभियानले समाजमा सकारात्मक प्रभाव पारिरहेको भन्दै निरन्तरता आवश्यक रहेको बताए।
Discussion about this post