मधेसी हक–अधिकारका अधिवक्ता महतो पार्टीको केन्द्रीय जिम्मेवारीमा

महेश सिंह लहान- मधेस र मधेसी हक–अधिकारका लागि लामो समयदेखि सक्रिय रहँदै आएका ललित नारायण महतो जनता समाजवादी पार्टी (जसपा) नेपालको भातृसंगठन समाजवादी युवा संघ नेपालको केन्द्रीय सदस्यमा चयन भएका छन्।
राजनीतिमा सेवामूलक सोच बोकेका महतोलाई पार्टीले संगठन सुदृढीकरणका उद्देश्यले महत्वपूर्ण जिम्मेवारी प्रदान गरेको युवा संघले जनाएको छ।

एक औपचारिक कार्यक्रममा महतोले पद–जिम्मेवारी ग्रहण गरेका हुन्। मधेसी हक–अधिकारका मुद्दा उठाउने नेताका रूपमा परिचित महतो पार्टीभित्र विचारशील तथा अनुशासित युवा नेतृत्वका रूपमा चिनिन्छन्।

महतो २०६२/०६३ सालको मधेस जनविद्रोहदेखि राजनैतिक रूपमा सक्रिय हुँदै आएका हुन्। तत्कालीन जय प्रकाश गुप्ता नेतृत्वको तराई–मधेस अभियानबाट आफ्नो राजनीतिक यात्रा सुरु गरेका उनले मधेस आन्दोलनका विभिन्न चरणमा सहभागिता जनाउँदै मधेसी समुदायका अधिकारका पक्षमा निरन्तर आवाज उठाउँदै आएका छन्।

महतोले जिम्मेवारी पाएपछि सामाजिक सञ्चालमा बधाई तथा शुभकामना दिनेको ओहिरो लागेको छ।
पदभार ग्रहणपछि उनले संगठनलाई सही दिशा दिने, युवालाई सशक्त बनाउने र मधेसका मुद्दा संस्थागत रूपमा अघि बढाउने प्रतिबद्धता व्यक्त गरे।